اروپايي اتحادیه اوکراین ته ۹۰ میلیارد یورو بې‌بهره پور ورکوي

د اروپايي اتحادیې د غړو هېوادونو مشرانو د اوکراین د راتلونکې مالي ملاتړ په اړه هوکړې ته رسېدلي دي. د جرمني صدراعظم فریدریش مرتس د بروکسل د لوړې کچې له غونډې وروسته اعلان وکړ، چې اوکراین به له اروپايي اتحادیې څخه لږ تر لږه ۹۰ میلیارد یورو بې‌بهره پور ترلاسه کړي

مرتس وویل، چې دا مالي سرچینې به د راتلونکو دوو کلونو لپاره د اوکراین د پوځي اړتیاوو او دولتي بودجې د تمویل لپاره بسیا وي. د هغه په وینا، اروپايي اتحادیه غواړي ډاډ ترلاسه کړي چې اوکراین د جګړې په روانو شرایطو کې له مالي پلوه یوازې پاتې نه شي

د جرمني صدراعظم همداراز ټینګار وکړ، چې د روسیې شتمنۍ به تر هغه وخته کنګل پاتې شي، څو دا هېواد اوکراین ته د جګړې له امله اوښتي زیانونه جبران نه کړي. هغه وویل: «موږ دا حق، د نړیوالو قوانینو له مخې، په بشپړ ډول ځان ته محفوظ ساتو چې که روسیه هېڅ ډول تاوان ورنه کړي، د هغې له شتمنیو څخه د اوکراین د تاوان د ورکړې لپاره کار واخلو

مرتس زیاته کړه، چې د دې تاوان د تمویل جوړښت بدل شوی او په بروکسل کې د شپږ ساعته خبرو پر مهال دا څرګنده شوه، چې د روسیې له دولتي شتمنیو څخه مستقیم برداشت کول یو ډېر پېچلی حقوقي بهیر دی. خو د هغه په خبره، اصلي هدف ـ دا چې روسیه باید د دې جګړې لګښت ورکړي ـ ترلاسه شوی دی.

شنونکي وایي، د اروپايي اتحادیې دا پرېکړه د اوکراین لپاره یو مهم سیاسي او مالي ملاتړ بلل کېږي او دا پیغام ورکوي چې اروپايي هېوادونه د اوږدې مودې لپاره د کییف ترڅنګ ولاړ دي. په ورته وخت کې، د روسیې د شتمنیو د کنګل ساتلو پرېکړه ښيي چې پر مسکو د فشار سیاست لا هم د اروپايي اتحادیې د تګلارې مهمه برخه ده