اخبار جهان

ایټالیا د افغانستان ځانګړي اماني صندوق ته ۲.۴ میلیونه یورو مرسته وکړه

اشتراک گذاری:

کابل – د افغانستان ځانګړي اماني صندوق اعلان کړی، چې ایټالیا دغه صندوق ته د ۲.۴ میلیونه یورو مالي مرسته کړې ده. دا مرسته د افغانستان د خلکو د ملاتړ او د بنسټیزو پرمختیايي پروګرامونو د پیاوړتیا په موخه ترسره شوې ده.

د افغانستان ځانګړي اماني صندوق د پنجشنبې په ورځ (د جدی ۱۱مه) پر خپلې اېکس پاڼې لیکلي، چې دا مرسته د فرهنګي میراث د ساتنې، د انساني مېشت‌ځایونو د ښه‌والي او پراختیا، او همدارنګه د اقتصادي حل‌لارو د پلي کېدو لپاره ځانګړې شوې، څو ټولنې د اقلیمي بدلونونو پر وړاندې لا ډېرې مقاومې شي.

د یاد صندوق په وینا، دا مالي ملاتړ به د هغو پروژو د پیاوړتیا لامل شي، چې موخه یې د خلکو د ژوند د شرایطو ښه کول، دوامدار اقتصادي فرصتونه رامنځته کول، او د اقلیمي بدلونونو منفي اغېزو ته عملي حل‌لارې موندل دي.

افغانستان ځانګړي اماني صندوق د ایټالیا له حکومت څخه د دې مرستې له امله مننه کړې او دا یې د نړیوالې ټولنې د دوامدار ملاتړ یوه مهمه بېلګه بللې ده.

دا مرسته په داسې حال کې کېږي، چې د ملګرو ملتونو اړوند بنسټونو د تېر میلادي کال پر مهال څو ځله خبرداری ورکړی و، چې په افغانستان کې د بشري مرستو او د خلکو له اړتیاوو سره سم د پراختیايي پروژو د پلي کولو لپاره له جدي مالي کمښت سره مخ دي. دغو بنسټونو ټینګار کړی، چې د نړیوالو مرستو دوام د افغانستان د بشري وضعیت د ښه‌والي لپاره حیاتي ارزښت لري