چین په سین‌ کیانګ کې نوی اداري واحد جوړ کړ؛ د سرحدي امنیت د پیاوړتیا هڅه

چین په سین‌ کیانګ کې نوی اداري واحد جوړ کړ؛ د سرحدي امنیت د پیاوړتیا هڅه

بریانیوز:(دوشنبه،۲۴ حمل۱۴۰۵)

چین اعلان کړی چې د خپل لوېدیځ ولایت سین‌کیانګ کې یې یو نوی اداري واحد د «سن‌لینګ» په نوم جوړ کړی دی؛ هغه سیمه چې د افغانستان او د کشمیر له هغې برخې سره نږدې پرته ده چې د پاکستان تر کنټرول لاندې ده او له ستراتیژیک پلوه خورا مهمه بلل کېږي

د راپورونو له مخې، دغه نوی اداري واحد د قراقروم غرونه ته نږدې او د واخان دهلېز په امتداد کې موقعیت لري. دا تنګ دهلېز چین له افغانستان سره نښلوي او د اوږدې مودې راهیسې د امنیتي پلوه حساسه سیمه ګڼل کېږي، ځکه چې د تګ راتګ محدودې لارې لري او د سرحدي څار لپاره ځانګړې پاملرنې ته اړتیا ده

چینایي چارواکو ویلي چې د دې اداري واحد د جوړولو اساسي هدف د سرحدونو کنټرول پیاوړی کول او د هغو احتمالي وسلوالو ډلو د نفوذ مخنیوی دی، چې بیجینګ یې د خپل ملي امنیت لپاره ګواښ بولي. د چارواکو په وینا، دا په تېرو څه باندې یو کال کې درېیم نوی اداري جوړښت دی چې په سین‌کیانګ کې رامنځته کېږي

د امنیتي اندېښنو له جملې څخه یوه هم د ختیځ ترکستان اسلامي غورځنګ فعالیتونه دي، چې چین یې د بېلتون‌پالنې او افراطي تګلارو له امله جدي خطر ګڼي. بیجینګ باور لري چې دا ډول ډلې هڅه کوي له سرحدي لارو استفاده وکړي او د چین خاورې ته ننوځي

د سین‌کیانګ سیمه‌ییز حکومت ویلي چې دا نوی اداري واحد د مارچ په ۲۶مه رسمي جوړ شوی او ټاکل شوې چې د کاشغر ښار تر ادارې لاندې فعالیت وکړي. کاشغر یو تاریخي ښار دی چې د چین او منځنۍ اسیا ترمنځ د سوداګرۍ او تګ راتګ یو مهم مرکز بلل کېږي

کارپوهان وایي، دا اقدام ښيي چې چین په وروستیو کلونو کې د خپلو سرحدي سیمو امنیت ته ځانګړې پاملرنه کوي او غواړي هلته حکومتي جوړښتونه پیاوړي کړي. په ځانګړي ډول، هغه سیمې چې له قومي حساسیتونو او فرامرزي ګواښونو سره مخ دي، د بیجینګ د امنیتي ستراتیژۍ په لومړیتوبونو کې شاملې شوې دي

ځینې شنونکي په دې باور دي چې د دې ډول اداري واحدونو رامنځته کول نه یوازې امنیتي موخې لري، بلکې د اقتصادي او بنسټیزو پروژو د پراختیا لپاره هم زمینه برابروي، څو دغه لرې پرتې سیمې د هېواد له مرکزي نظام سره لا ډېرې ونښلول شي