اخبار جهان

سپاه پاسداران: د هرمز تنګي ته د پوځي بېړیو نږدې کېدل د اوربند ښکاره نقض دی؛ د سخت غبرګون خبرداری

اشتراک گذاری:

بریانیوز:(دوشنبه،۲۴ حمل۱۴۰۵)

د سپاه پاسداران انقلاب اسلامی اعلان کړی چې د تنگه هرمز لور ته د هر ډول پوځي بېړیو نږدې کېدل به د امریکا سره د اعلان شوي دوه اوونیز اوربند ښکاره سرغړونه وبلل شي او د “قاطع، سمدستي او سخت” غبرګون سبب به شي

په هغه رسمي بیان کې چې د ایران دولتي رسنیو خپور کړی، ویل شوي چې د هرمز تنګی د هېواد د بحري ځواکونو تر “هوښیار، دقیق او بشپړ کنټرول” لاندې دی او د هر ډول امنیتي ګواښ پر وړاندې به له بې‌ساري جديت سره اقدام وشي. سپاه ټینګار کړی چې دا ستراتیژیک سمندري دهلېز د ایران د ملي امنیت له حیاتي برخو څخه شمېرل کېږي او هېڅ بهرنی نظامي تحرک به پکې د منلو وړ نه وي

په بیان کې زیاته شوې چې د هرمز تنګي له لارې د غیرنظامي او سوداګریزو بېړیو تګ راتګ، د نړیوالو مقرراتو او مشخصو امنیتي پروتوکولونو له مخې، عادي او خوندي پاتې دی. خو هر ډول نظامي حرکت، نږدې کېدل یا تحریکي اقدامات به د “ښکاره خطر” په توګه و ارزول شي او د سختې پوځي ځوابي اقدام لامل به شي

تنگه هرمز د نړۍ له تر ټولو حساسو سمندري لارو څخه ګڼل کېږي، ځکه چې د نړیوالې انرژۍ یوه مهمه برخه، په ځانګړي ډول تېل او ګاز، له همدې لارې انتقالېږي. د دې سیمې هر ډول بې‌ثباتي نه یوازې د سیمې هېوادونه اغېزمنوي، بلکې د نړیوالو بازارونو د تېلو بیې او د انرژۍ امنیت ته هم مستقیم ګواښ پېښولای شي

سیاسي شنونکي وایي چې د سپاه پاسداران وروستی خبرداری د سیمې د امنیتي وضعیت د لا زیات حساسېدو څرګندونه کوي. د هغوی په باور، په داسې حال کې چې د ایران او امریکا ترمنځ د تاوتریخوالي کچه لا هم لوړه ده، هر ډول پوځي حرکت یا غلطه محاسبه کولی شي وضعیت له کنټروله وباسي

همداراز شنونکي زیاتوي چې د هرمز تنګي په اړه دا ډول سخت دریځونه معمولاً د نړیوالو فشارونو، سیاسي پیغامونو او امنیتي موازنو برخه وي، خو په عین حال کې د ناڅاپي شخړو د زیاتېدو خطر هم ورسره مل وي

په ټوله کې، د سپاه پاسداران دا تازه دریځ ښيي چې ایران د خپلو سمندري پولو د امنیت په اړه سخت حساسیت لري او هر ډول پوځي نږدېوالی د سرې کرښې په توګه ګڼي، چې پایله یې د احتمالي جدي او بېړني غبرګون احتمال زیاتوي