د آندامان سمندر کې د کډوالو کښتۍ ډوبه شوه؛ شاوخوا ۲۵۰ کسان نادرکه دي

د آندامان سمندر کې د کډوالو کښتۍ ډوبه شوه؛ شاوخوا ۲۵۰ کسان نادرکه دي

بریا نیوز:(چهارشنبه، ۲۶ حمل ۱۴۰۵)

د آندامان په سمندر کې د روهینګیا کډوالو او بنګله‌ دېشي وګړو یوه کښتۍ د سختو سمندري شرایطو له امله ډوبه شوې، چې له امله یې شاوخوا ۲۵۰ کسان نادرکه شوي دي

د راپورونو له مخې، دا کښتۍ چې لسګونه نارینه، ښځې او ماشومان پکې سپاره وو، د سختو بادونو، لوړو څپو او د کښتۍ د زیاتې ګڼه‌ګوڼې له امله له کنټروله وتلې او بالاخره ډوبه شوې ده. ویل کېږي چې کښتۍ د خپل ظرفیت څخه زیاته ډکه وه، چې دا یې د پېښې اصلي لامل بلل کېږي

د رویترز د راپور له مخې، ژغورونکې ډلې لا هم د نادرکه شویو کسانو د موندلو هڅې روانې ساتلي، خو د خرابو هوايي شرایطو له امله د ژغورنې عملیات له ستونزو سره مخ دي. تر اوسه د ژوندي پاتې شویو کسانو په اړه کره معلومات نه دي خپاره شوي

روهینګیا کډوال، چې ډېری یې د میانمار څخه تښتېدلي، له کلونو راهیسې له سختو بشري او امنیتي شرایطو سره مخ دي او هڅه کوي چې د سمندر له لارې نورو هېوادونو ته ځانونه ورسوي. بنګله‌دېشي وګړي هم د اقتصادي ستونزو له امله د غیرقانوني کډوالۍ خطرناک سفرونه کوي

کارپوهان وایي چې دا ډول پېښې د انساني قاچاقبرانو د شبکو د فعالیتونو پایله ده، چې بې‌وزله خلک د ښه ژوند په هیله له خطرناکو لارو تېرولو ته هڅوي. دوی ټینګار کوي چې د سیمې هېوادونه باید د کډوالو د ستونزې د حل لپاره ګډ اقدامات وکړي

د بشري حقونو سازمانونو له نړیوالې ټولنې غوښتي چې د دې پېښې په اړه جدي پام وکړي او د هغو کسانو د ژغورنې لپاره عاجلې مرستې برابرې کړي چې ښايي لا هم ژوندي وي