محمد حلیم فدایي: د الله ګل مجاهد د کورنۍ وژنه د طالبانو تر ملاتړ لاندې سازمان شوی قتل دی

اشتراک گذاری:

افغان سیاستوال په کابل کې د پخواني وکیل او جهادي قومندان د زوی او د هغه د کورنۍ د غړو د وژنې په غبرګون کې د طالبانو پر امنیتي او استخباراتي سیسټم سختې نیوکې کړې دي.

بریانیوز( دوشنبه، ٤ جوزا ١٤٠٥)

فدایي ویلي، طالبان هڅه کوي دا پېښه “شخصي دښمني” وښيي، خو د ده په وینا، د کابل په تر ټولو ګڼ مېشته سیمه کې د ورځې په رڼا کې دا ډول برید د واکمنو له ملاتړ پرته ناشونی دی.

هغه د الله ګل مجاهد او طالبانو د اړیکو مخینې ته په اشارې سره ویلي:
«طالبانو له الله ګل مجاهد سره د جمهوریت پر مهال هم اړیکې لرلې. د نظام د سقوط پر مهال یې هغه سپک کړ، وروسته یې بېرته هېواد ته راوغوښت، دوسیه یه ورته جوړه کړه او زنداني یې کړ او حتی د اعدام حکم یې هم پرې صادر کړی و.»

فدایي زیاتوي چې د طالبانو اوسنی حاکمیت “بې مسولیته او بې قانونه” دی او خلک باید د هغوی پر ژمنو باور ونه کړي.

دا څرګندونې وروسته له هغې شوې چې تېره ورځ د کابل د سرای شهزاده ترڅنګ په بیروبار بازار کې د الله ګل مجاهد زوی احسان الله مجاهد، د هغه مېرمن او دوه نور کسان په وسله‌وال برید کې ووژل شول.