ټوکیو/کابل جاپان افغانستان کې د نوو پراختیايي پروژو او بشري مرستو پر دوام ټینګار وکړ

اشتراک گذاری:

بریانیوز- دوشنبه ٢۵ جوز ١٤٠٥

کابل – د اقتصاد وزیر دین‌محمد حنیف په افغانستان کې د جاپان له سفیر کنیچي ماساموتو سره په لیدنه کې د اقتصادي همکاریو، بشري مرستو او پراختیايي پروګرامونو د پراخولو په اړه خبرې کړې دي

د جاپان سفیر په دې کتنه کې ویلي، هېواد یې د اسلامي امارت له بیا واکمنېدو راهیسې افغانستان ته د ۵۶۰ میلیونو ډالرو په ارزښت بشري مرستې برابرې کړې دي. هغه زیاته کړې چې جاپان د افغانانو د ملاتړ او د بشري اړتیاوو د پوره کولو په موخه خپلو همکاریو ته دوام ورکوي

د نوموړي په وینا، د روان کال لپاره د ۳۵ میلیونو ډالرو په ارزښت د پراختیايي پروژو د پلي کېدو پلان هم چمتو شوی دی. هغه څرګنده کړه چې ۹.۳ میلیونه ډالره به د اوبو د سرچینو د سم مدیریت، د اقلیمي بدلونونو د اغېزو د کمولو او په کابل ښار کې د څښاک اوبو د کمښت د ستونزې د راکمولو لپاره ولګول شي

بلخوا د اقتصاد وزیر دین‌محمد حنیف د جاپان له مرستو او همکاریو مننه وکړه او ویې ویل چې افغانستان لا هم د خوړو د نه خوندیتوب، بېوزلۍ او بېکارۍ له جدي ننګونو سره مخ دی. هغه ټینګار وکړ چې پراختیايي پروژې او دوامدارې اقتصادي مرستې د خلکو د ژوند د ښه والي او د اقتصادي ثبات د پیاوړتیا لپاره مهمې دي

حنیف همداراز د نړیوالو همکارانو د لا ډېرو همکاریو غوښتنه وکړه او ویې ویل چې د معیشتي ستونزو کمول، د کارموندنې فرصتونو زیاتول او د اقتصادي ودې ملاتړ د افغانستان له مهمو لومړیتوبونو څخه دي

دا په داسې حال کې ده چې جاپان په تېرو کلونو کې د افغانستان د بشري او پراختیايي ملاتړ له مهمو شریکانو څخه پاتې شوی او د بېلابېلو برخو د ودې لپاره یې لسګونه پروژې تمویل کړې دي