سفر

لوګزامبورګ: د افغان کډوالو د ستنولو لپاره له کابل سره خبرو ته چمتو یو

اشتراک گذاری:

بریانیوز پنجشنبه ( ۵/ سنبله /۱۴۰۵هـ.ش)

د لوګزامبورګ د کورنیو چارو وزیر لیون ګلوډن وايي، هېواد یې افغانستان ته د افغان کډوالو د بېرته ستنولو په اړه له اسلامي امارت سره له خبرو کولو ډډه نه کوي

ګلوډن له یوې لوګزامبورګي ورځپاڼې سره په مرکه کې ویلي، د هغو افغانانو د بېرته ستنولو لپاره چې د پناه غوښتنې شرایط نه پوره کوي، له کابل سره خبرې او همغږي مهمه ده

د نوموړي په وینا، لوګزامبورګ تر دې وړاندې په دې اړه له جرمني چارواکو سره هم خبرې کړې دي. هغه ویلي، جرمني د هغو افغان اتباعو د بېرته ستنولو په برخه کې د مرستې لپاره مثبت دریځ ښودلی چې په دغه هېواد کې د جرمونو له امله د ایستلو وړ بلل کېږي

د لوګزامبورګ د کورنیو چارو وزیر ټینګار کړی چې د افغان کډوالو د ستنولو موضوع به د اړوندو هېوادونو ترمنځ د همغږۍ او خبرو له لارې تعقیبوي

د افغانستان د اتباعو د بېرته ستنولو موضوع په داسې حال کې د اروپايي هېوادونو د بحثونو یوه مهمه برخه ګرځېدلې چې یو شمېر اروپايي حکومتونه غواړي د رد شویو پناه غوښتونکو او هغو کسانو د ایستلو بهیر چټک کړي چې د دوی په وینا، د قانوني پاتې کېدو شرایط نه لري

په ورته وخت کې، د افغان کډوالو د جبري ستنولو په اړه د بشري حقونو بنسټونه اندېښنه لري او ټینګار کوي چې هر ډول ستنول باید د افرادو د خوندیتوب او بشري حقونو له اصولو سره سم ترسره شي