د پاکستان فدرالي حکومت : خیبر پښتونخوا ته ۱۱ کسیزه مشورتي شورا جوړه شوه؛ د غړو نومونه اعلان شول

د پاکستان فدرالي حکومت :  خیبر پښتونخوا ته ۱۱ کسیزه مشورتي شورا جوړه شوه؛ د غړو نومونه اعلان شول

(بریانیوز دو شنبه (۲۰/ میزان /۱۴۰۵هـ.ش

د پاکستان فدرالي حکومت په خیبر پښتونخوا کې د بېړني حالت او د والي د واکمنۍ له اعلان وروسته، د ولایتي چارو د پرمخ وړلو لپاره ۱۱ کسیزه مشورتي شورا جوړه کړې ده. د شورا غړي به د والي فیصل کریم کنډي تر مشرۍ لاندې د ولایت په اداري چارو کې همکاري کوي

د پاکستان د قانون وزیر اعظم نذیر تارړ، د اطلاعاتو وزیر عطاالله تارړ او د کورنیو چارو وزیر محسن نقوي په ګډه خبري غونډه کې د دې پرېکړې اعلان وکړ. د قانون وزیر وویل، د اساسي قانون د ۲۳۲ او ۲۳۴ مادو له مخې د بېړني حالت او د والي د واکمنۍ له پلي کېدو وروسته، د اعلی وزیر او ولایتي کابینې واکونه والي ته لېږدول شوي دي

د حکومت د اعلان له مخې، په مشورتي شورا کې لاندې کسان شامل دي

- کفایت‌الله خان: د کورنیو چارو چارې

- طارق محمود پاشا: مالي چارې

- امیر جاوېد: حقوقي چارې

- ډاکټر سید امیر عبدالله: د پوهنې چارې

- متقاعد جنرال ډاکټر نګار جوهر خان: روغتیا

- ډاکټر سرفراز علي شاه: کانونه او معدني سرچینې

- ډاکټر محمد ارشاد: صنعت او سوداګري

- آصف رفیق افریدي: د اړیکو او ودانیزو چارو اداره

- مولانا محمد طیب قریشي: مذهبي چارې

- عثمان سیف‌الله خان: انرژي

- سمر هارون بلور: اطلاعات او خپرونې

فدرالي حکومت همداراز امیر جاوېد د خیبر پښتونخوا نوی څارنوال عمومي ټاکلی دی. نوموړي تر دې وړاندې هم په دغه ولایت کې د څارنوال عمومي په توګه دنده ترسره کړې ده

د حکومت په وینا، د دې شورا موخه د ولایتي ادارو د چارو منظمول، د امنیتي وضعیت ښه کول او روغتیا، پوهنې، اقتصاد او نورو عامه خدمتونو ته پاملرنه ده

خو د خیبر پښتونخوا د واکونو فدرالي حکومت ته د لېږد پرېکړه د سیاسي لانجې لامل شوې او د پاکستان تحریک انصاف دا اقدام د ولسي رایې او جمهوري بهیر پر وړاندې ګام بللی دی