د سپین بولدک ـ چمن له لارې د قاچاق کاروبار پراخ شوی؛ د طالبانو لوړپوړي چارواکي پکې لاس لري

اشتراک گذاری:

د پاکستان او افغانستان ترمنځ د رسمي تګ راتګ او سوداګرۍ د محدودیتونو په دوام، د سپین بولدک ـ چمن له لارې د غیررسمي لېږد کاروبار پراخ شوی او د مسافرو او سوداګریزو توکو لېږد د دې لارې له مهمو فعالیتونو څخه ګرځېدلی دی.

بریانیوز- چهارشنبه، ٢٢ میزان ١٤٠٥

له پاکستان سره د رسمي سوداګرۍ او تګ راتګ د لارو تړل کېدو او محدودیتونو په دوام، د سپین بولدک ـ چمن له لارې قاچاقي کاروبار زور اخیستی دی. د ترلاسه شویو معلوماتو له مخې، په داسې حال کې چې د ډیورنډ کرښې په اوږدو کې د تګ راتګ پر ډېرو دروازو محدودیتونه لګېدلي، د سپین بولدک له لارې د مسافرو او سوداګریزو توکو د غیررسمي لېږد کاروبار لا هم روان دی.

د معلوماتو له مخې، ځینې شرکتونه د مسافرو د اوښتو په بدل کې له یوې تر دوو لکو پاکستانۍ کلدارو پورې پیسې اخلي او د پیسو په بدل کې د تګ راتګ چارې پر مخ وړي. د سرچینو په وینا، د دې بهیر په دوام کې د کرښې دواړو خواوو ته پیسې ورکول کېږي.

د مسافرو د لېږد ترڅنګ، د درملو او نورو سوداګریزو توکو قاچاق هم روان ده.

خوراکي توکی، جامی، موټر او برېښنايي وسایل هم په قاچاقی لارو افغانستان ته راوړل کیږی.

د سرچینو د ادعاوو له مخې، د دغه کاروبار په دوام کې د طالبانو د لوړپوړو چارواکو نومونه هم مطرح دي او ادعا کېږي چې د پیسو د ورکړې او د تګ راتګ د اسانتیاوو له لارې د دې بهیر د روان ساتلو زمینه برابره شوې ده.