ګانیون: بدخشان کې د دوامدار معیشت لپاره لا ډېرو پانګونو ته اړتیا ده

ګانیون: بدخشان کې د دوامدار معیشت لپاره لا ډېرو پانګونو ته اړتیا ده

 بریانیوز سه شنبه ( ۳/ سنبله /۱۴۰۵هـ.ش)

بدخشان — د افغانستان لپاره د ملګرو ملتونو د مرستندویه پلاوي سرپرستې جورجیت ګانیون بدخشان ته د سفر پر مهال ویلي چې په افغانستان کې د بدیلو پراختیايي فرصتونو د رامنځته کولو او د خلکو د دوامدار معیشت د پیاوړتیا لپاره لا ډېرو پانګونو ته اړتیا ده

ګانیون د بدخشان د سفر پر مهال له سیمه‌ییزو چارواکو، قومي مشرانو او د ټولنې له بېلابېلو استازو سره کتلي او د خلکو د ژوند پر وړاندې د شته اقتصادي او ټولنیزو ستونزو په اړه یې خبرې کړې دي

د یوناما سرپرستې د ښځو د وضعیت او د هغوی د اقتصادي ونډې په اړه هم بحث کړی او ټینګار یې کړی چې د خلکو د ژوند د ښه کېدو لپاره باید د کار او عاید دوامدار فرصتونه رامنځته شي

نوموړې د نشه‌یي توکو د زیانونو د کمولو لپاره پر روانو هڅو هم خبرې کړې او د دې برخې د ملاتړ او د زیانمنو کسانو د درملنې لپاره یې د ملګرو ملتونو پر دوامدارې همکارۍ ټینګار کړی دی

ګانیون په فیض‌اباد ښار کې له یو شمېر سوداګرو ښځو سره هم لیدلي او د هغوی د اقتصادي فعالیتونو، ستونزو او اړتیاوو په اړه یې خبرې کړې دي

د یوناما سرپرستې په بدخشان کې د ملګرو ملتونو په ملاتړ د روږدو کسانو د درملنې او ملاتړ له یوه مرکز څخه هم لیدنه کړې ده. نوموړې د دغه مرکز فعالیتونه او د نشه‌یي توکو له امله زیانمنو کسانو ته د برابرېدونکو خدمتونو بهیر له نږدې کتلی دی

د ګانیون دا سفر په داسې حال کې ترسره کېږي چې په افغانستان کې د بېوزلۍ، بېکارۍ او د عاید د محدودو سرچینو له امله د خلکو د اقتصادي وضعیت د ښه کولو لپاره د پراختیايي پروژو او پانګونو اړتیا لا هم جدي بلل کېږي

ملګري ملتونه وايي، د دوامدار معیشت د رامنځته کولو لپاره یوازې بېړنۍ مرستې بسنه نه کوي، بلکې د کار، سوداګرۍ، پانګونې او بدیلو اقتصادي فرصتونو پراختیا هم اړینه ده