د کار نشتوالی افغانان له هېواده باسي؛ طالبان د ناقانونه سفرونو د مخنیوي په فکر کې

اشتراک گذاری:

د طالبانو د هرات والي رسنیز دفتر وايي، چې د دغه ولایت د والي په مشرۍ په یوه ناسته کې ګاونډیو هېوادونو ته د افغانانو د ناقانونه سفرونو د مخنیوي پر لارو چارو خبرې شوې دي.

بریانیوز- چهارشنبه، ٤ سنبله ١٤٠٥

د هرات د والي دفتر په وینا، په دې ناسته کې د دولتي ځمکو د غصب د مخنیوي ترڅنګ، د خلکو د اقتصادي وضعیت د ښه کولو او د بدیلو کاري فرصتونو د رامنځته کولو پر موضوع هم بحث شوی دی.

دا ناسته داسې مهال ترسره کېږي چې په افغانستان کې د کار او عاید د مناسبو فرصتونو نشتوالی د ډېرو کورنیو لپاره په یوه جدي اقتصادي ستونزه بدل شوی او ګڼ افغانان د کار او ښه ژوند د موندلو لپاره د هېواد پرېښودو ته اړ کېږي.

په ورته وخت کې، د خلکو اقتصادي ستونزې او د بېلابېلو مالیاتو، فیسونو او لګښتونو د ورکړې فشارونه د کورنیو پر اقتصادي وضعیت اغېز کړی.

د هرات د والي دفتر وايي، د بدیلو کاري فرصتونو رامنځته کول به د خلکو د اقتصادي وضعیت په ښه کېدو کې مرسته وکړي؛ خو لا څرګنده نه ده چې د دغو فرصتونو د رامنځته کولو لپاره به عملي پروګرامونه څه ډول او په کومه کچه پلي کېږي.

د اقتصادي ستونزو له دوام سره، د افغانانو د ناقانونه سفرونو د مخنیوي ترڅنګ د کارموندنې او د خلکو د عاید د زیاتولو لپاره د عملي او دوامدارو لارو رامنځته کول هم د طالبانو پر وړاندې له مهمو ننګونو څخه بلل کېږي.