تاشکند : د کابل او تاشکند نوې اقتصادي همکاري؛ د څلور میلیارده ډالرو تړونونه

تاشکند : د کابل او تاشکند نوې اقتصادي همکاري؛ د څلور میلیارده ډالرو تړونونه

 بریانیوز پنجشنبه ( ۵/ سنبله /۱۴۰۵هـ.ش)

 افغانستان او اوزبېکستان په وروستیو کلونو کې د سیاسي او ډیپلوماتیکو اړیکو ترڅنګ د سوداګرۍ، ترانزیټ، پانګونې او اقتصادي همکاریو د پراختیا لپاره هم هڅې چټکې کړې دي

د افغانستان د صنعت او سوداګرۍ وزارت وايي، د دواړو هېوادونو ترمنځ د سوداګرۍ کچه په تېر کال کې نږدې یو میلیارد او ۲۰۰ میلیونه ډالرو ته رسېدلې ده؛ هغه رقم چې د کابل او تاشکند ترمنځ د اقتصادي اړیکو د پراخېدو څرګندونه کوي

د دغه وزارت د معلوماتو له مخې، اوزبېکستان تېر کال د افغانستان د صادراتو درېیم لوی بازار هم و. افغانستان دغه هېواد ته د تېر کال په ترڅ کې د شاوخوا ۱۵۱ میلیونه ډالرو په ارزښت توکي صادر کړي دي

د اقتصادي اړیکو د پراختیا په لړ کې د دواړو هېوادونو ترمنځ د بېلابېلو برخو لپاره د څلور میلیارده ډالرو په ارزښت تړونونو او همکاریو خبره هم شوې ده. تمه ده چې د دغو هوکړو عملي کېدل د پانګونې، سوداګرۍ او ګډو اقتصادي پروژو لپاره نوې زمینه برابره کړي

اوزبېکستان د افغانستان لپاره د منځنۍ اسیا له مهمو سوداګریزو او ترانزیټي شریکانو څخه ګڼل کېږي. د دواړو هېوادونو نږدې جغرافیایي موقعیت د دې امکان برابروي چې افغانستان د منځنۍ اسیا بازارونو ته د سوداګریزو توکو د رسولو او د سیمې د ترانزیټ په یوه مهمه لاره بدل شي

افغان چارواکي باور لري چې د سوداګرۍ د حجم زیاتوالی او د پانګونې د هوکړو عملي کېدل کولی شي د افغانستان د صادراتو د پراختیا، د عوایدو د زیاتېدو او د هېواد د اقتصادي ودې لپاره مهم رول ولوبوي

د کابل او تاشکند ترمنځ د اقتصادي همکاریو پراختیا په داسې حال کې ده چې دواړه هېوادونه هڅه کوي د سوداګرۍ او ترانزیټ ترڅنګ په انرژۍ، صنعت او نورو اقتصادي برخو کې هم ګډې پروژې پراخې کړي