تعلیم

مرجان متین: د نجونو زده کړې باید له طالبانو سره د تعامل مهم معیار وګرځي

اشتراک گذاری:

(بریانیوز شنبه (۴/ میزان /۱۴۰۵هـ.ش

د پوهنې وزارت پخوانۍ مرستیاله مرجان متین وايي، د افغان نجونو او ښځو د زده کړو حق باید له اسلامي امارت سره د نړیوالې ټولنې د تعامل لپاره په یوه روښانه او عملي معیار بدل شي

نوموړې د ملګرو ملتونو د عمومي اسامبلې په څنډه کې یوې غونډې ته ویلي، د نجونو د زده کړو مخنیوی هغوی له خپلواکۍ، مسلکي پرمختګ او د کار له فرصتونو بې برخې کوي

متین له نړیوالې ټولنې غوښتي چې د طالب چارواکو پر سفرونو د بندیزونو د پراخولو ترڅنګ، د هغو ښوونکو لپاره هم مالي ملاتړ برابر کړي چې د نجونو د زده کړو د محدودیتونو له امله یې خپلې دندې له لاسه ورکړې دي

هغې ټینګار کړی چې انلاین زده کړې د افغانستان د ټولو نجونو لپاره د لاسرسي وړ نه دي؛ ځکه په ډېرو سیمو کې د انټرنېټ، برېښنا او اړینو وسایلو نشتوالی د زده کړو پر وړاندې جدي خنډونه رامنځته کوي

د پوهنې وزارت پخوانۍ مرستیاله وړاندیز کوي چې هغو نجونو ته دې د انټرنېټ له اړتیا پرته د زده کړو د دوام لپاره درسي کتابونه او نور ښوونیز توکي ورسول شي، څو له رسمي زده کړو بې برخې شوې نجونې لږ تر لږه د زده کړو له بهیر سره اړیکه وساتي