نیمروز : سوداګر د ګمرکي اسانتیاوو او معیاري تمځایونو غوښتنه کوي

نیمروز :  سوداګر د ګمرکي اسانتیاوو او معیاري تمځایونو غوښتنه کوي

(بریانیوز دوشنبه (۱۱/ عـقـرب/۱۴۰۵هـ.ش

په نیمروز ولایت کې یو شمېر سوداګر د دغه ولایت په ګمرک کې د سوداګریزو توکو د تخلیې، ارزونې او لېږد لپاره د معیاري اسانتیاوو له نشتوالي شکایت کوي او له اړوندو ادارو غواړي چې د ګمرک د تمځایونو وضعیت ښه کړي

سوداګر وایي، د ګمرک په تمځایونو کې د مناسبو امکاناتو نشتوالی د دوی سوداګریز فعالیتونه له ستونزو سره مخ کړي دي

د دوی په وینا، د توکو د تخلیې او ارزونې لپاره معیاري ځایونه او اړین تجهیزات نه شته، چې له امله یې د سوداګریزو چارو پرمخ وړل له ستونزو سره مل دي

دوی زیاتوي، د ګمرکي تمځایونو خراب وضعیت یوازې د توکو د تخلیې او ارزونې پر بهیر اغېز نه کوي، بلکې د سوداګرو او د مالونو د لېږدونکو موټرچلوونکو لپاره یې هم ستونزمن کاري چاپېریال رامنځته کړی دی

د سوداګرو په خبره، په ژمي کې د سړې هوا او په اوړي کې د ګرمۍ پر مهال د اړینو امکاناتو نشتوالی د دوی ستونزې لا زیاتوي. دوی وایي، په ګمرک کې د مناسب چاپېریال او لومړنیو اسانتیاوو نشتوالی د سوداګریزو فعالیتونو بهیر ټکنی کړی دی

نیمروز د افغانستان او ایران ترمنځ د سوداګرۍ او ترانزیټ له مهمو لارو څخه دی؛ له همدې امله سوداګر ټینګار کوي چې د دغه ولایت د ګمرک د تمځایونو بیارغونه، د توکو د ارزونې لپاره د معیاري ځایونو جوړول او د ژمي او اوړي لپاره د اړینو امکاناتو برابرول باید د اړوندو ادارو له لومړیتوبونو څخه وي