افغانستان په سیمه کې د روسیې د مایع ګاز (ال‌پي‌جي) تر ټولو لوی پېرېدونکی شو

د نړیوالو صنعتي سرچینو د راپورونو له مخې، افغانستان په سیمه کې د روسیې د مایع ګاز (ال‌پي‌جي) تر ټولو ستر پېرېدونکی ګرځېدلی دی. رویټرز خبري اژانس د صنعتي سرچینو له قوله راپور ورکړی چې د ۲۰۲۵ کال له جنورۍ تر نومبر میاشتې پورې، د روسیې د ال‌پي‌جي صادرات د مرکزي اسیا جمهوریتونو او افغانستان ته په مجموع کې ۱ اعشاریه ۰۱۶ میلیون ټنه ته رسېدلي دي

د راپور له مخې، تېر کال د روسیې د ټول ال‌پي‌جي صادراتو یوازې شاوخوا ۱۹ سلنه د یادو هېوادونو ونډه وه، خو دا کچه اوس ۳۶ سلنې ته لوړه شوې ده. دا بدلون ښيي چې روسیه د لوېدیځو بندیزونو تر فشار لاندې، په فعاله توګه د خپلو صادراتو بازارونه د اسیا او ګاونډیو هېوادونو پر لور اړولي دي

په دې لړ کې افغانستان تر ټولو لوی پېرېدونکی بلل شوی دی. د معلوماتو له مخې، افغانستان د یادې مودې په ترڅ کې له روسیې څخه شاوخوا ۴۱۸ زره ټنه مایع ګاز وارد کړی، چې دا د تېر کال په پرتله نږدې یو نیم برابر زیاتوالی ښيي. دا شمېرې څرګندوي چې افغانستان د انرژۍ د اړتیاوو د پوره کولو لپاره په زیاتېدونکې توګه پر روسي ګاز تکیه کوي

سرچینې وایي، د دې صادراتو لویه برخه د «کازروس‌ګاز» شرکت له لارې ترسره شوې ده، چې د روسیې او قزاقستان ګډه پانګونه ده. دغه شرکت د سیمې په کچه د ګازو د تولید، پروسس او صادراتو مهم رول لري او د روسیې د ال‌پي‌جي د لېږد لپاره یو اساسي دهلېز بلل کېږي

اقتصادي شنونکي وایي، افغانستان ته د مایع ګازو د وارداتو زیاتوالی له یوې خوا د هېواد د کورنیو اړتیاوو، په ځانګړي ډول د ژمي په موسم کې د سون‌توکو د لوړې غوښتنې ښکارندویي کوي، او له بلې خوا د سیمې په کچه د انرژۍ د سوداګرۍ په نقشه کې د افغانستان رول پیاوړی کوي. مایع ګاز په افغانستان کې د پخلي، تودوخې او سوداګریزو فعالیتونو لپاره تر ټولو مهم سون‌توکی ګڼل کېږي

خو شنونکي ټینګار کوي چې پر وارداتي انرژۍ د زیاتې تکیې ترڅنګ، افغانستان اړتیا لري چې د اوږدمهاله حل لپاره د بدیلو انرژۍ سرچینو پراختیا، د کورنیو زېرمو مدیریت او د انرژۍ د شفاف سیاست پر رامنځته کولو تمرکز وکړي. د هغوی په باور، که څه هم د روسیې ګاز د لنډ مهال لپاره د بازار تشه ډکوي، خو د دوامدار اقتصادي ثبات لپاره بنسټیزې اصلاحات اړین دي

په ټوله کې، افغانستان د روسیې د مایع ګاز تر ټولو لوی پېرېدونکی کېدل، د سیمې د انرژۍ په بازار کې یو مهم بدلون بلل کېږي، چې هم د روسیې د صادراتي تګلارې او هم د افغانستان د انرژۍ د اړتیاوو د بدلېدونکي واقعیت انځور وړاندې کوي