مسکو – د روسیې د بهرنیو چارو وزارت ویلي،د اوکراین د برید په وړاندې به د روسیې ځواب دیپلوماتیک نه وي

مسکو – د روسیې د بهرنیو چارو وزارت ویلي، چې مسکو به د اوکراین د وروستي برید په وړاندې داسې غبرګون وښيي چې له دودیزو دیپلوماتیکو چوکاټونو بهر به وي. دا څرګندونې د دغه وزارت ویاندې، ماریا زاخارووا، کړې دي

زاخارووا ویلي، هغه برید چې د روسیې د ولسمشر ولادیمیر پوتین د استوګنځي پر وړاندې شوی، یو جدي او خطرناک اقدام دی او مسکو یې ساده نه شي ګڼلای. د هغې په وینا، اوکراین باید دا تمه ونه لري چې د روسیې ځواب به یوازې سیاسي او دیپلوماتیک بڼه ولري، بلکې د مسکو غبرګون به «توپیر ولري او پرېکنده به وي

د روسي سرچینو په حواله، د بهرنیو چارو وزارت ویاندې ټینګار کړی چې دا ډول بریدونه نه یوازې د سیمې امنیت ګواښي، بلکې نړیوال وضعیت لا پسې ترینګلی کوي. هغې زیاته کړه چې مسکو د خپلو ملي ګټو، حاکمیت او د مشرتابه د امنیت د ساتنې لپاره ټول لازم انتخابونه پر میز لري

زاخارووا همدارنګه ویلي، دا برید د کی‌یف له لوري یو داسې اقدام دی چې نړیوال سیاسي پیغامونه لري. د هغې په وینا، دا پېښه د امریکا د ولسمشر ډونالد ټرمپ پر وړاندې هم یو «سخت سیلی» بلل کېدای شي، ځکه چې دا ډول کړنې د نړیوالو هڅو او سیاسي توازن پر ضد تمامېږي

سیاسي شنونکي باور لري چې د دې څرګندونو له خپرېدو سره به د مسکو او کی‌یف ترمنځ کړکېچ لا زیات شي او ښایي د سیمې امنیتي وضعیت نوې مرحلې ته داخل شي. روسیه ټینګار کوي چې د هر ډول ګواښ پر وړاندې به قوي او حساب شوی غبرګون وښيي، او د خپل امنیت په اړه به هېڅ ډول جوړجاړی ونه کړي

په داسې حال کې چې نړیواله ټولنه د دې ترینګلتیا د کمولو هڅې کوي، د مسکو وروستي دریځ دا څرګندوي چې راتلونکې ورځې به د سیمې لپاره ډېرې حساسې او برخلیک ټاکونکې وي