کابل — د روژې له رانږدې کېدو سره په کابل کې د بېوزلۍ او بېکارۍ اندېښنې زیاتې شوې

اشتراک گذاری:

بریانیوز:(شنبه،۲ حوت ۱۴۰۴)

د کابل یو شمېر اوسېدونکي وايي چې د روژې میاشتې له رانږدې کېدو سره اقتصادي ستونزې سختې شوې او ډېری کورنۍ د لومړنیو اړتیاوو د برابرولو توان نه لري

ښاریان شکایت کوي چې د خوراکي توکو بیې لوړې شوې او کاري فرصتونه کم شوي دي، چې له امله یې پر کورنیو اقتصادي فشار څو چنده زیات شوی. دوی له مرستندویه ادارو او د طالبانو اداره غواړي چې د روژې تر پیل مخکې د اړمنو کورنیو لپاره عملي او عاجل پروګرامونه پیل کړي، نه دا چې یوازې ژمنې تکرار شي

بل لور ته د اقتصاد وزارت وايي وچکالي، اقلیمي بدلونونه او بندیزونه د اقتصادي ستونزو اصلي لاملونه دي او د بېوزلۍ د کمولو لپاره طرحې تر کار لاندې دي، خو د عملي کېدو روښانه مهالوېش نه دی اعلان شوی

همداراز اوچا اعلان کړی چې د ۲۰۲۶ کال لپاره به په افغانستان کې د زیانمنو کسانو د بیړنیو اړتیاوو د پوره کولو ځانګړی پلان پلي کړي

کارپوهان وايي که بېړني ګامونه وانخیستل شي، ښايي د روژې په میاشت کې د خلکو د ژوند وضعیت نور هم سخت شي