افغانستان لا هم د امریکا د امنیتي اندېښنو په مرکز کې؛ سنتکام د احتمالي ګواښونو د نږدې

افغانستان لا هم د امریکا د امنیتي اندېښنو په مرکز کې؛ سنتکام د احتمالي ګواښونو د نږدې څار خبر ورکړ

بریا نیوز (جمعه،۲۴ثور ۱۴۰۵) 

د امریکا د متحدو ایالتونو مرکزي قوماندانۍ، یا سنتکام، ویلي چې افغانستان لا هم د واشنګټن د امنیتي پاملرنې له مهمو محورونو څخه شمېرل کېږي او امریکا د دغه هېواد له خاورې د احتمالي ګواښونو اړوند فعالیتونه له نږدې څاري

د سنتکام چارواکو په خپلو تازه څرګندونو کې ټینګار کړی چې د افغانستان وضعیت د امریکا د امنیتي ادارو لپاره ځانګړی اهمیت لري، ځکه واشنګټن هڅه کوي د هر هغه احتمالي خطر مخه ونیسي چې ښایي د سیمې او نړۍ امنیت ته ګواښ پېښ کړي

د امریکا پوځي او استخباراتي کړۍ باور لري چې د افغانستان جغرافیه، سیمه‌ییز بدلونونه او د سختدریځو ډلو فعالیتونه لا هم د نړیوالو امنیتي معادلو مهمه برخه جوړوي. همدې اندېښنو ته په کتو، سنتکام وایي چې د څارنې، استخباراتي ارزونې او امنیتي تحلیلونو لړۍ یې دوام لري

شنونکي وایي، سره له دې چې امریکایي ځواکونه له افغانستانه وتلي، خو واشنګټن لا هم هڅه کوي د لرې واټن استخباراتي او امنیتي تګلارو له لارې د افغانستان تحولات تر نظر لاندې وساتي

بلخوا، د سیمې یو شمېر هېوادونه هم د افغانستان د امنیتي وضعیت په اړه اندېښنې لري او باور څرګندوي چې د ثبات ټینګښت نه یوازې د افغانستان، بلکې د ټولې سیمې لپاره حیاتي ارزښت لري

کارپوهان ټینګار کوي چې اقتصادي ثبات، سیاسي تفاهم او سیمه‌ییزه همکاري کولای شي افغانستان د اوږدمهاله امنیت او آرامۍ پر لور رهبري کړي، څو دغه هېواد نور د نړیوالو امنیتي اندېښنو په محور بدل نه شي