مقاله

مسکو: ایران د اټومي وسلو د جوړولو نیت نه لري

اشتراک گذاری:

بریا نیوز (چهار شنبه ،۳۰ثور ۱۴۰۵)

د روسیې د بهرنیو چارو مرستیال وزیر ویلي، د ایران اوسنی مشرتابه لا هم خپلو نړیوالو ژمنو ته وفادار دی او د اټومي وسلو د جوړولو هېڅ اراده نه لري

ریابکوف ټینګار کړی چې ایران د سوله‌ییزې اټومي انرژۍ د کارولو بشپړ حق لري او نړیوال لوري باید دغه حق ته درناوی وکړي. نوموړي زیاته کړې، مسکو باور لري چې د تهران او واشنګټن ترمنځ روان کړکېچ باید د خبرو، تفاهم او ډیپلوماسۍ له لارې حل شي، نه د زور او پوځي ګواښونو له لارې

روسي چارواکي همداراز ویلي، هېواد یې چمتو دی چې د امریکا او ایران ترمنځ د منځګړیتوب رول ترسره کړي، څو د سیمې امنیت خوندي پاتې شي او د جګړې د اور د پراخېدو مخه ونیول شي

دغه څرګندونې په داسې حساس وخت کې کېږي چې د منځني ختیځ فضا یو ځل بیا ترینګلې شوې او د احتمالي شخړو په اړه نړیوالې اندېښنې زیاتې شوې دي. سیاسي شنونکي وایي، روسیه هڅه کوي د روانو کړکېچونو په حل کې خپل اغېزناک سیاسي حضور نور هم پیاوړی کړي