د لاجورد کمپلکس د کار پیل؛ ملا برادر د معیاري ښارونو پر جوړولو ټینګار وکړ

د لاجورد کمپلکس د کار پیل؛ ملا برادر د معیاري ښارونو پر جوړولو ټینګار وکړ

بریا نیوز (چهار شنبه ،۳۰ثور ۱۴۰۵)

د ملا عبدالغني برادر د اقتصادي مرستیال په مشرۍ په بلخ ولایت کې د «کمپلکس لاجورد» د عملي کار د پیل په مراسمو کې وویل، چې افغانستان هم حق لري چې معیاري ښارونه، عصري زیربناوې او پرمختللي استوګنیز کمپلکسونه ولري

ملا برادر دغه پروژه یوازې د ودانیو مجموعه ونه بلله، بلکې هغه یې د اقتصادي ودې، ښاري پرمختګ، ملي پانګونې د جلب او د راتلونکو نسلونو لپاره د روښانه راتلونکي یو مهم سمبول وباله. د هغه په وینا، د داسې لویو پروژو پیل د هېواد د اقتصادي ځان‌بسیاینې پر لور یو مهم ګام دی

د ورکړل شویو معلوماتو له مخې، په دې پروژه کې به شاوخوا ۱۴۴۸ عصري اپارتمانونه د معیاري ډیزاین او پرمختللو اسانتیاوو سره جوړ شي، څو خلکو ته د خوندي او ارام ژوند زمینه برابره کړي

د اقتصادي چارو مرستیال زیاته کړه، چې په هېواد کې د سراسري امنیت له ټینګښت وروسته د کورني او بهرني پانګونې لپاره مناسب فرصتونه برابر شوي دي، او له همدې امله د بېلابېلو اقتصادي پروژو د پیل لړۍ ګړندۍ شوې ده

هغه وویل، د لاجورد کمپلکس په څېر پروژې کولای شي د بلخ اقتصادي موقعیت لا پیاوړی کړي، چې د هېواد له مهمو تاریخي، فرهنګي، سوداګریزو او صنعتي مرکزونو څخه شمېرل کېږي، او همدارنګه د شمالي زون اقتصادي خوځښت ته وده ورکړي

ملا برادر ټینګار وکړ چې حکومت د زیربنایي او صنعتي پروژو د ملاتړ ژمن دی او هڅه کوي چې د اقتصادي پرمختګ لپاره د پانګونې فضا لا پراخه کړي