د امریکا او ایران خبرو کې د پاموړ پرمختګ؛ ونس د نوې هوکړې هیله څرګنده کړه

د امریکا او ایران خبرو کې د پاموړ پرمختګ؛ ونس د نوې هوکړې هیله څرګنده کړه

بریا نیوز (چهار شنبه ،۳۰ثور ۱۴۰۵)

د امریکا د حکومت لوړپوړي چارواکي جې ډي ونس ویلي، چې د واشنګټن او تهران تر منځ روانو خبرو کې “پاموړ پرمختګ” شوی او دواړه لوري هڅه کوي د اوږدمهاله کړکېچ لپاره یوه سیاسي او ډیپلوماټیکه حل‌لاره ومومي

ونس په خپلو وروستیو څرګندونو کې ټینګار کړی، چې د خبرو اترو فضا تر پخوا ډېره مثبته شوې او داسې نښې لیدل کېږي چې ښایي دواړه هېوادونه د شخړو د کمولو پر لور مهم ګامونه واخلي

هغه زیاته کړې، چې د خبرو موخه یوازې د اټومي پروګرام مسئله نه ده، بلکې د سیمې امنیت، اقتصادي ثبات او د نړیوالو اندېښنو راکمېدل هم پکې شامل دي

د راپورونو له مخې، د منځني ختیځ وروستي ترینګلتیاوې او د جګړې د پراخېدو وېره د دې لامل شوې، چې دواړه خواوې د خبرو مېز ته لا ډېرې نږدې شي. سیاسي شنونکي باور لري، که دا پرمختګونه عملي بڼه خپله کړي، نو نه یوازې به د امریکا او ایران اړیکې نرمې شي، بلکې د سیمې پر اقتصادي او امنیتي وضعیت به هم مثبت اغېز ولري

بلخوا ایراني چارواکو هم د خبرو د دوام ملاتړ کړی، خو ټینګار یې کړی چې هر ډول هوکړه باید د ایران ملي ګټو او خپلواکۍ ته درناوی ولري. تهران وایي، د بندیزونو لرې کېدل او اقتصادي فشارونو کمېدل د هرې احتمالي موافقې مهم شرطونه دي

د نړیوالو چارو څارونکي وایي، د امریکا او ایران تر منځ د اړیکو هر ډول نرمښت کولی شي د منځني ختیځ په سیاست کې نوی باب پرانیزي او هغه هېوادونه چې د جګړو او بې‌ ثباتۍ له امله اغېزمن شوي، د ارامۍ ساه واخلي