سیاست

چین او روسیې د افغانستان په اړه د لا زیاتې همغږۍ غوښتنه وکړه

اشتراک گذاری:

بریا نیوز (جمعه ،۱جوزا، ۱۴۰۵)

د شي جین‌ پینګ او ولادمیر پوتین ترمنځ په ګډه خپره شوې اعلامیه کې د افغانستان په اړه د لا پراخې همغږۍ او همکاریو پر اړتیا ټینګار شوی دی

په اعلامیه کې ویل شوي چې ترهګري لا هم د سیمې او نړۍ د امنیت لپاره یو جدي ګواښ ګڼل کېږي او د دې خطر د مخنیوي لپاره ګډې او منظمې هڅې اړینې دي. دواړو مشرانو د امنیتي همکاریو، استخباراتي همغږۍ او سیمه‌ییز ثبات پر پیاوړتیا ټینګار کړی دی

چین او روسیې همداراز څرګنده کړې چې د افغانستان وضعیت د منځنۍ اسیا، جنوبي اسیا او پراخې سیمې له امنیت او اقتصادي ثبات سره مستقیم تړاو لري، او له همدې امله باید نړیوال او سیمه‌ ییز هېوادونه په ګډه د ثبات د ټینګښت لپاره کار وکړي

شنونکي وایي، د بیجینګ او مسکو دا تازه دریځ ښيي چې دواړه ځواکمن هېوادونه هڅه کوي د افغانستان په تړاو خپل ګډ سیاست لا منظم او اغېزناک کړي. د هغوی په باور، چین او روسیه اندېښنه لري چې د ترهګرو ډلو فعالیتونه ښايي د سیمې امنیتي توازن ګډوډ کړي

په وروستیو کلونو کې چین او روسیې څو ځله د افغانستان په اړه ګډې ناستې او سلا مشورې کړې دي، او دواړه هېوادونه ټینګار کوي چې د افغانستان ثبات د سیمې د اقتصادي دهلېزونو، سوداګرۍ او امنیت لپاره حیاتي ارزښت لري