مقاله

د تورخم پر لارې د ترانسپورترانو احتجاج؛ افغانستان ته غځېدلې لاره تړل شوې وه

اشتراک گذاری:

بریا نیوز (شنبه ،۲جوزا، ۱۴۰۵)

پاکستاني ترانسپورترانو او د باروړونکو موټرونو مالکانو نن د خیبرپښتونخوا د خیبر ولسوالۍ په لنډي کوتل سیمه کې افغانستان ته غځېدلې مهمه سوداګریزه لاره د احتجاج په توګه تړلې وه

اعتراض کوونکو ویلي، د ګمرکي چارو ستونزې، د تګ راتګ محدودیتونه او د سوداګریزو موټرو پر وړاندې رامنځته شوي خنډونه هغه لاملونه دي چې دوی یې احتجاج ته اړ کړي دي

د دوی په وینا، د باروړونکو موټرو ځنډېدلو نه یوازې سوداګرو ته درانه مالي زیانونه اړولي، بلکې د سوداګرۍ بهیر یې هم اغېزمن کړی دی

راپورونه وایي، د لارې د تړل کېدو له امله لسګونه باروړونکي موټر په دواړو غاړو کې بند پاتې وو او د توکو لېږد رالېږد له ستونزو سره مخ شوی و. ځینې موټر چلوونکي وایي، که ستونزو ته ژر حللار ونه موندل شي، نو د سیمې پر سوداګرۍ او بازارونو به یې منفي اغېزې لا زیاتې شي

بلخوا سیمه‌ ییزو چارواکو هڅه کړې چې له اعتراض کوونکو سره خبرې وکړي او لاره بېرته د تګ راتګ پر مخ خلاصه کړي. تر اوسه د دواړو لورو ترمنځ د خبرو د پایلو په اړه بشپړ جزییات نه دي خپاره شوي

شنونکي وایي، د تورخم او خیبر لارې هر ډول بندښت د افغانستان او پاکستان ترمنځ پر سوداګرۍ، ترانزیټ او د لومړنیو توکو پر بیو مستقیم اغېز کوي، ځکه دا لاره د دواړو هېوادونو ترمنځ له مهمو اقتصادي دهلېزونو څخه شمېرل کېږي