ملګري ملتونه: په افغانستان کې میلیونونه کسان لا هم پاکو اوبو ته لاسرسی نه لري

ملګري ملتونه: په افغانستان کې میلیونونه کسان لا هم پاکو اوبو ته لاسرسی نه لري

 بریانیوز سه شنبه (۲۴/ سنبله /۱۴۰۵هـ.ش)

 د ملګرو ملتونو د بشري استوګنې پروګرام  وايي، په افغانستان کې میلیونونه کسان لا هم د څښاک پاکو او خوندي اوبو ته له لاسرسي بې‌برخې دي او په ټول هېواد کې د اوبو رسولو د اسانتیاوو د پراختیا لپاره د چټکو او بنسټیزو هڅو اړتیا ده

دغه بنسټ ټینګار کوي چې د اوبو د سرچینو د خوندي کولو او د خلکو د روغتیا د ساتنې لپاره باید د ښارونو په جوړولو او پراختیا کې د اوبو موضوع په پام کې ونیول شي او د اوبو سرچینې په سمه توګه مدیریت شي

د ملګرو ملتونو د بشري استوګنې پروګرام د افغانستان د ۲۰۲۶ او ۲۰۲۷ کلونو د لومړیتوبونو په یوه راپور کې ویلي، چې د څښاک اوبو ته لاسرسی په ځانګړي ډول په کلیوالو سیمو او غیررسمي ښاري مېشت ځایونو کې له جدي ستونزو سره مخ دی

د دغه بنسټ په وینا، کابل، کندهار او هرات د نفوسو د چټک زیاتوالي، د اقلیمي بدلون د اغېزو او د اوبو له اړوندو بنسټونو سره د کافي پانګونې د نشتوالي له امله د اوبو رسولو له سختو ننګونو سره مخ دي

په ورته وخت کې، د ځمکې لاندې اوبو د کچې کمېدل د افغانستان په ګڼو ښارونو کې د اوبو د راتلونکي په اړه اندېښنې زیاتې کړې دي. د ملګرو ملتونو د بشري استوګنې پروګرام د معلوماتو له مخې، کابل ښايي تر ۲۰۳۰ کال پورې د ځمکې لاندې اوبو د زېرمو د کمښت له جدي خطر سره مخ شي

دغه بنسټ وايي، د اقلیمي بدلون، اوږدمهالو وچکالیو، چټک ښاري کېدو او د اوبو د زېرمو د کمزوري مدیریت له امله د اوبو ستونزه لا پراخېدای شي؛ له همدې امله د اوبو د سرچینو ساتنه، د رسولو د شبکو پراختیا او د ښاري پلان جوړونې پیاوړتیا د افغانستان لپاره له مهمو اړتیاوو څخه دي