میرضیایف: د شانګهای سازمان دې له افغانستان سره منظمې خبرې بیا پیل کړي

میرضیایف: د شانګهای سازمان دې له افغانستان سره منظمې خبرې بیا پیل کړي

بریانیوزپنجشنبه (۲۶/ سنبله /۱۴۰۵هـ.ش)

 د اوزبېکستان ولسمشر شوکت میرضیایف د شانګهای همکاریو له سازمان څخه غوښتي چې له افغان استازو سره منظمې خبرې اترې بېرته پیل کړي او د افغانستان په اړه د امنیتي، اقتصادي او سیمه‌ییزو همکاریو موضوعات په ګډه وڅېړي

میرضیایف د شانګهای همکاریو سازمان د غړو هېوادونو د مشرانو په ۲۶مه غونډه کې په بیشکیک کې ویلي، په افغانستان کې د سولې او ثبات ساتل د سیمې د امنیت او دوامدار پرمختګ لپاره اساسي شرط دی.

هغه وړاندیز کړی چې د شانګهای سازمان او افغانستان ترمنځ منظمې خبرې بیا پیل شي، څو د سیمې د امنیتي اندېښنو، د افغانستان د اقتصادي ودې او په سیمه‌ییزو همکاریو کې د دغه هېواد د لا ډېرې ونډې په اړه بحثونه وشي

د اوزبېکستان ولسمشر ویلي، سیمه له داسې سوکاله افغانستان سره اړتیا لري چې په رغنده سیمه‌ییزو بهیرونو کې مدغم وي. د هغه په وینا، د افغانستان ثبات کولی شي د مرکزي او جنوبي اسیا ترمنځ د ترانزیټي لارو، سوداګرۍ او انرژۍ په برخو کې د همکاریو د پراختیا زمینه برابره کړي

شانګهای همکاریو سازمان افغانستان ته د څارونکي هېواد حیثیت ورکړی او له دغه هېواد سره د اړیکو لپاره د «افغانستان ـ شانګهای همکاریو سازمان د تماس ډلې» میکانیزم هم له پخوا موجود دی

د میرضیایف دا وړاندیز داسې مهال مطرح کېږي چې د بیشکیک په وروستۍ غونډه کې افغانستان د سیمې د امنیت او پرمختګ له مهمو موضوعاتو څخه بلل شوی او د شانګهای سازمان مشرتابه د افغانستان په اړه د سیمه‌ییزو همکاریو پر دوام ټینګار کړی دی