اخبار جهان

د اف‌بي‌آی مشر: محمد شریف‌الله د کابل هوايي ډګر د برید په تړاو محکوم شوی

اشتراک گذاری:

بریانیوز جمعه (۲۷/ سنبله /۱۴۰۵هـ.ش

د امریکا د فدرالي تحقیقاتو ادارې «اف‌بي‌آی» مشر کش پټل ویلي، محمد شریف‌الله چې د داعش غړی بلل کېږي، د کابل نړیوال هوايي ډګر د «ابي دروازې» د برید په تړاو نیول شوی او د خپلو جرمونو له امله محکوم شوی دی

پټل ویلي، شریف‌الله په ۲۰۲۵ کال د مارچ په میاشت کې له افغانستان څخه امریکا ته انتقال شوی و او وروسته یې د یادې قضیې په تړاو محاکمه ترسره شوه

د ۲۰۲۱ کال د اګست په ۲۶مه د کابل نړیوال هوايي ډګر د «ابي دروازې» په سیمه کې ځانمرګی برید وشو چې د امریکايي چارواکو په وینا، په کې ۱۳ امریکايي سرتېري ووژل شول او ګڼ شمېر افغان ملکي وګړو ته هم مرګ‌ژوبله واوښته

د اف‌بي‌آی مشر ټینګار کړی چې د ابي دروازې برید به د دوی له یاده ونه وځي او هغه کسان به تعقیب کړي چې د امریکايي ځواکونو پر وړاندې د بریدونو په طرحه او ترسره کولو کې لاس ولري

د شریف‌الله قضیه د کابل هوايي ډګر د هغه خونړي برید له مهمو قضایي قضیو څخه ده چې له پېښې څو کاله وروسته یې په تړاو یو شکمن کس امریکا ته انتقال او محاکمه شو