تهران – د ایران ولسمشر مسعود پزشکیان د تهران له لاریونونو وروسته: د خلکو مشروع غوښتنو ته دې رسېدنه وشي

تهران – د ایران ولسمشر مسعود پزشکیان، په پلازمېنه تهران کې د ملي اسعارو د ارزښت د لوېدو او خراب اقتصادي وضعیت پر ضد د دوو پرله‌پسې ورځو لاریونونو وروسته، خپل حکومت ته لارښوونه کړې چې د معترضانو «مشروع غوښتنو» ته جدي رسېدنه وکړي

پزشکیان د سې‌شنبې په ورځ، د ډسمبر ۳۰مه، په ټولنیزه شبکه «ایکس» (پخوانی ټویټر) کې په یوه پیغام کې لیکلي چې د خلکو معیشت او اقتصادي ستونزې د هغه ورځنۍ او اساسي اندېښنه ده. نوموړي ټینګار کړی چې حکومت مکلف دی د ولس غږ واوري او عملي حل‌لارې ولټوي.

د ایران ولسمشر په خپل پیغام کې ویلي:

«د خلکو معیشت زما ورځنۍ اندېښنه ده. ما د کورنیو چارو وزیر ته دنده سپارلې چې د معترضانو له استازو سره د خبرو له لارې د هغوی مشروع غوښتنې واوري، څو حکومت وکولای شي په بشپړ توان د ستونزو د حل لپاره اقدام وکړي او مسوولانه ځواب ورکړي

په تېرو دوو ورځو کې په تهران کې سلګونه کسان سړکونو ته راوتلي وو او د ملي اسعارو د بې‌ساري کمزورتیا، د بیو د لوړېدو، بې‌کارۍ او د ژوند د لګښتونو د زیاتوالي پر وړاندې یې خپل اعتراض څرګند کړی و. معترضانو ویل، اقتصادي فشارونه د خلکو ورځنی ژوند له جدي ستونزو سره مخ کړی او د عادي کورنیو د زغم کچه تر ټولو ټیټې کچې ته رسېدلې ده

اقتصادي شنونکي وایي، د ایران ملي اسعارو ارزښت په وروستیو میاشتو کې په چټکۍ سره راکم شوی، چې دا چاره د خوراکي توکو، درملو او نورو اساسي اړتیاوو بیې لوړې کړې دي. د دوی په باور، بندیزونه، د پانګونې کمښت او د باور بحران د دې اقتصادي کړکېچ له مهمو لاملونو څخه دي

د ولسمشر پزشکیان دا څرګندونې د دې نښه بلل کېږي چې حکومت هڅه کوي د لاریونونو د پراخېدو مخه ونیسي او د خلکو قهر د خبرو اترو له لارې کابو کړي. خو یو شمېر منتقدین وایي، یوازې ژمنې بسنه نه کوي او ولس د عملي او چټکو اقتصادي اصلاحاتو تمه لري

سیاسي شنونکي باور لري، که حکومت د معیشتي ستونزو د حل لپاره روښانه او اغېزمن ګامونه وانخلي، نو د ولس نارضایتي ښايي نوره هم زیاته شي. د دوی په اند، د خلکو د باور بېرته ترلاسه کول به د حکومت لپاره یو له سترو ازموینو څخه وي

په داسې حال کې چې د ایران اقتصاد له سختو ننګونو سره مخ دی، د ولسمشر تازه دریځ ښيي چې حکومت د ولس د غږ د اورېدو هڅه کوي، خو دا به راتلونکې ورځې وښيي چې ایا دا ژمنې به عملي بڼه خپله کړي او که نه