افغانستان؛ بې‌کارۍ یو بل ځوان وواژه، د کابل انجينر له ځان‌سوځونې وروسته ومړ

اشتراک گذاری:

ځايي سرچينې په کابل کې وايي، هغه سړی چې پرون یې د بې‌وزلۍ او بې‌کارۍ له امله ځان ته اور اچولی و، نن په روغتون کې ساه ورکړې ده.

بریانیوز( چهارشنبه، ٣٠ ثور ١٤٠٥)

د سرچينو په وينا، دغه سړی د درېیو لوڼو پلار و او کورنۍ یې له سختو اقتصادي ستونزو سره مخ وه. نوموړي ځان د کابل پوهنتون د انجينرۍ پوهنځي فارغ‌التحصيل معرفي کړی و او ويلي یې وو چې د کار موندلو لپاره یې ګڼو ادارو ته مراجعه کړې، خو ونه توانېد چې دنده ترلاسه کړي.

دغه پېښه په داسې حال کې رامنځته کېږي چې طالبان د خپلو جنګيالو د معاشونو او امتيازاتو د زياتېدو خبرونه ورکوي. همداراز، طالبان تل ادعا کوي چې د هېواد اقتصاد د ودې په حال کې دی او نږدې هره ورځ د نويو اقتصادي پروژو د پرانيستې اعلانونه کوي.

خو د کابل د دغه ځوان مړينه يو ځل بيا د بې‌کارۍ، بې‌وزلۍ او اقتصادي فشارونو پر وړاندې د خلکو د سخت ژوند واقعيتونه را برسېره کړي دي.