د کابل او تاشکند ترمنځ د صنعتي انقلاب نوې هیله؛ افغانستان ته د شلو فابریکو د لېږد ستره

د کابل او تاشکند ترمنځ د صنعتي انقلاب نوې هیله؛ افغانستان ته د شلو فابریکو د لېږد ستره هوکړه

بریا نیوز (پنجشنبه ،۳۱ثور ۱۴۰۵)

د افغانستان او ازبکستان ترمنځ د اقتصادي او سوداګریزو اړیکو د پراختیا لپاره هڅې لا ګړندۍ شوې دي او په همدې موخه د افغانستان د صنعت او سوداګرۍ وزیر او د ازبکستان د وزیرانو شورا د سپکو صنعتونو د پراختیا ادارې مشر ناظم‌جان خالمرادوف ترمنځ مهمه دوه اړخیزه ناسته ترسره شوې ده

دا غونډه د دواړو هېوادونو ترمنځ د اقتصادي باور، صنعتي همکارۍ او ګډو پانګونو د پراختیا لپاره یو مهم ګام بلل کېږي

د صنعت او سوداګرۍ وزارت د معلوماتو له مخې، په دې ناسته کې د بېلابېلو اقتصادي او صنعتي موضوعاتو په اړه پراخې خبرې شوې دي. د بحثونو لویه برخه په افغانستان کې د پنبې پر معیاري کر، د نساجۍ سکټور پر پیاوړتیا، د تار او ټوکر د تولید پر پراختیا او د کورنیو تولیداتو پر لوړولو راڅرخېده. دواړو لورو ټینګار کړی، چې افغانستان د پراخو کرنیزو او بشري سرچینو له امله کولای شي په سیمه کې د نساجۍ او سپکو صنعتونو په مهم مرکز بدل شي

همداراز ازبکستان چمتووالی ښودلی چې شاوخوا شل صنعتي فابریکې افغانستان ته ولېږدوي، څو په هېواد کې د تولیداتو کچه لوړه، د کار زمینه پراخه او اقتصادي فعالیتونه پیاوړي شي. ویل کېږي، دا فابریکې به په بېلابېلو صنعتي برخو کې فعالیت وکړي او د افغانستان د صنعتي ودې لپاره به نوی فصل پرانیزي. اقتصادي شنونکي باور لري، چې د دغو فابریکو لېږد به د هېواد د صادراتو په زیاتوالي او د وارداتو په کمېدو کې هم مهم رول ولوبوي

په ناسته کې د ترمذ په بازار کې د ګډ نړیوال نندارتون د جوړېدو په اړه هم خبرې شوې دي. ټاکل شوې دغه نندارتون به د افغانستان او ازبکستان سوداګرو، صنعتکارانو او پانګه‌والو ته فرصت برابر کړي، څو خپل تولیدات نندارې ته وړاندې او نوي سوداګریز تړونونه لاسلیک کړي. دغه راز به د دواړو هېوادونو ترمنځ د سوداګرۍ کچه نوره هم لوړه او د سیمه‌ییز اتصال بهیر به پیاوړی شي

کارپوهان وایي، چې د کابل او تاشکند ترمنځ د اقتصادي همکاریو پراخېدل نه یوازې د دواړو هېوادونو لپاره ارزښت لري، بلکې د ټولې سیمې اقتصادي ثبات او سوداګریز پرمختګ ته هم نوې هیلې راژوندۍ کوي. د دوی په باور، که دا پروژې عملي بڼه خپله کړي، افغانستان به د سیمې په مهم صنعتي او سوداګریز دهلېز بدل شي او زرګونو ځوانانو ته به د کار او هوسا ژوند زمینه برابره شي