ملګرو ملتونو کې د هند توند دریځ؛ پاکستان د کابل پر خونړي برید او د کډوالو پر ایستلوتورن شو

ملګرو ملتونو کې د هند توند دریځ؛ پاکستان د کابل پر خونړي برید او د کډوالو پر ایستلوتورن شو

بریا نیوز (پنجشنبه ،۳۱ثور ۱۴۰۵) 

په ملګرو ملتونو کې د هند استازي د افغانستان پر وضعیت غونډه کې پر پاکستان سختې نیوکې کړې او ویلي یې دي، چې نړۍ لا هم د روان کال د روژې مبارکې میاشتې پر مهال په کابل کې د نشه‌ یي توکو د درملنې پر مرکز ترسره شوی خونړی هوايي برید نه دی هېر کړی

د هند استازي پرواتانېني هریش د یوناما د راپور په حواله ویلي، چې د ۲۰۲۶ کال په لومړیو درېیو میاشتو کې په افغانستان کې د ملکي وګړو د مرګ‌ژوبلې او ټپي کېدو شاوخوا اووه سوه پنځوس پېښې ثبت شوې دي، چې ډېری یې د پاکستاني پوځ د پولې هاخوا وسله‌والو بریدونو او هوايي حملو له امله رامنځته شوې دي

هغه د ملګرو ملتونو غونډې ته د وینا پر مهال ټینګار وکړ، چې پاکستان د ملګرو ملتونو د سرمنشي هغه غوښتنه هم له پامه غورځولې، چې د نړیوالو اصولو له مخې دې د ملکي وګړو خوندیتوب ته درناوی وشي او د افغان کډوالو جبري ایستل دې ودرول شي

هریش ویلي، چې په افغانستان کې د تاوتریخوالي دوام او د ملکي وګړو زیانمنېدل د سیمې ثبات ته جدي ګواښ جوړوي او نړیواله ټولنه باید د دغو پېښو پر وړاندې چوپ پاتې نه شي. نوموړي زیاته کړې، چې د بشري حقونو او نړیوالو قوانینو رعایت د هر هېواد مسوولیت دی او هېڅ لوری باید د ملکي خلکو ژوند له خطر سره مخ نه کړي

بلخوا د سیاسي چارو شنونکي باور لري، چې په ملګرو ملتونو کې د هند دا څرګندونې به د افغانستان او پاکستان ترمنځ پر روانو اړیکو او سیمه‌ییزو سیاسي بحثونو ژور اغېز ولري. د دوی په وینا، د افغان کډوالو موضوع، د پولې هاخوا بریدونه او د امنیتي کړکېچ دوام اوس د نړیوالو ناستو مهم بحثونه ګرځېدلي دي

کارپوهان وایي، که نړیوال بنسټونه د ملکي وګړو د خوندیتوب او د کډوالو د حقونو په اړه جدي اقدامات ونه کړي، نو په سیمه کې به بشري او امنیتي ستونزې لا پسې پراخې شي