له ایران او پاکستانه د زرګونو افغانانو ستنېدل؛ کډوالونړیوال سازمان د راستنېدونکو شمېر۱۱۴ زره ډېر ښيي

له ایران او پاکستانه د زرګونو افغانانو ستنېدل؛ کډوالونړیوال سازمان د راستنېدونکو شمېر۱۱۴ زره ډېر ښيي

بریا نیوز (پنجشنبه ،۳۱ثور ۱۴۰۵) 

د کډوالو په اړه د ملګرو ملتونو اړوند سازمان نړیوال سازمان د مهاجرت ویلي، چې د روان میلادي کال د اپرېل له ۲۶مې د مې تر ۹مې پورې له ایران او پاکستان څخه ټولټال ۱۱۴۳۲۱ افغانان په جبري او اختیاري ډول افغانستان ته راستانه شوي دي

یاد سازمان په خپل وروستي راپور کې څرګنده کړې، چې د راستنېدو دغه بهیر په دواړو لورو کې دوام لري او په ځانګړي ډول له پاکستان او ایران سره د پولو له لارې د خلکو تګ راتګ زیات شوی دی. راپور زیاتوي، چې د دغو راستنېدونکو یوه برخه په زور ایستل شوي، خو بله برخه د اقتصادي ستونزو، قانوني وضعیت او د اقامې د محدودیتونو له امله په خپله خوښه هېواد ته ستانه شوي دي

د معلوماتو له مخې، د راستنېدونکو لوی شمېر کورنۍ شاملې دي، چې ښځې او ماشومان هم په کې شامل دي، او ډېری یې له سختو اقتصادي او بشري ستونزو سره مخ دي. نړیوال سازمان د مهاجرت خبرداری ورکړی، چې که د راستنېدونکو لپاره د سرپناه، کار او لومړنیو خدماتو زمینه برابره نه شي، نو بشري وضعیت به لا پسې خراب شي

دغه سازمان له نړیوالې ټولنې او مرسته کوونکو هېوادونو غوښتي، چې افغانستان ته د راستنېدونکو کسانو د ملاتړ لپاره خپلې مرستې زیاتې کړي او د سرحدي سیمو د خدماتو د ښه والي لپاره عملي اقدامات ترسره کړي

شنونکي وایي، د راستنېدو دا پراخ بهیر د افغانستان پر داخلي اقتصاد، د کار بازار او ټولنیزو خدماتو جدي فشار راوړي. د دوی په باور، که د کډوالو د ادغام او ملاتړ لپاره اوږدمهاله پروګرامونه جوړ نه شي، نو د بې‌وزلۍ او بې‌کارۍ کچه به نوره هم لوړه شي

کارپوهان ټینګار کوي، چې د کډوالو مسئله یوازې بشري نه، بلکې اقتصادي او سیاسي اړخونه هم لري، او د سیمې هېوادونه باید د ګډو حل لارو په موندلو کې جدي همکاري وکړي