د ترکیې ډیپلوماټیک دریځ؛ اردوغان له ټرمپ سره په خبرو کې د امریکا او ایران د خبرو اترو ملاتړ وکړ

د ترکیې ډیپلوماټیک دریځ؛ اردوغان له ټرمپ سره په خبرو کې د امریکا او ایران د خبرو اترو ملاتړ وکړ

بریا نیوز (پنجشنبه ،۳۱ثور ۱۴۰۵)

د ترکیې ولسمشر رجب طیب اردوغان د امریکا له ولسمشر ډونالډ ټرمپ سره په ټیلیفوني خبرو کې د واشنګټن او تهران ترمنځ د روانو ډیپلوماټیکو هڅو هرکلی کړی او د دواړو لورو ترمنځ د اوربند د غځېدو اقدام یې مثبت بللی دی

د ترکیې د ولسمشرۍ ماڼۍ د اعلامیې له مخې، اردوغان په دې خبرو کې ټینګار کړی چې د اختلافاتو لپاره «منطقي او ډیپلوماټیک حل لارې ممکنې دي» او انقره به د هغو ټولو نوښتونو ملاتړ ته دوام ورکړي چې د خبرو اترو او سولې د پیاوړتیا لپاره ترسره کېږي

هغه همدارنګه ویلي، چې د منځني ختیځ په اوسني حساس وضعیت کې د تاوتریخوالي کمول او د سیاسي حل لارو هڅول د سیمې د ثبات لپاره اړین دي

په همدې ټیلیفوني خبرو کې د ترکیې ولسمشر د لبنان پر وضعیت هم اندېښنه څرګنده کړې او ویلي یې دي چې باید ژر تر ژره عملي ګامونه واخیستل شي څو د وضعیت د لا خرابېدو مخه ونیول شي

دا څرګندونې په داسې حال کې کېږي چې په لبنان کې د تاوتریخوالي او د اسرائیلي بریدونو راپورونه دوام لري او د سیمې وضعیت لا هم کړکېچن پاتې دی

اردوغان د سوریې د وضعیت په اړه هم خبرې کړې او ویلي یې دي چې هلته نسبي ثبات د سیمې لپاره یو مهم پرمختګ ګڼل کېږي. هغه ټینګار کړی چې په منځني ختیځ کې د امنیت او ثبات ساتل د ټولو هېوادونو ګډ مسوولیت دی

کارپوهان وایي، د ترکیې دا دریځ ښيي چې انقره هڅه کوي د سیمه‌ییزو بحرانونو په کمولو کې فعاله ډیپلوماټیکه ونډه ولري او د امریکا، ایران او نورو سیمه‌ییزو لوبغاړو ترمنځ د خبرو اترو د پیاوړتیا لپاره منځګړیتوب ته دوام ورکړي