مقاله

د افغان کډوالو جبري ستنول؛ د ملګرو ملتونو اندېښنه

اشتراک گذاری:

بریا نیوز (جمعه ،۱جوزا، ۱۴۰۵)

د ملګرو ملتونو د بشري حقونو ستر کمیشنر، د افغان کډوالو د جبري ستنولو د دوام په اړه سخته اندېښنه ښودلې او ویلي یې دي چې دا کړنه د نړیوالو بشري اصولو او د کډوالو د ساتنې له قوانینو سره ټکر لري

هغه ویلي، افغانستان لا هم له سخت بشري ناورین، ناامنۍ، لوږې، بېوزلۍ او د بشري حقونو له خراب حالت سره مخ دی، او په داسې وخت کې د افغانانو جبري ستنول به د زرګونو کورنیو ژوند له نورو ستونزو او کړاوونو سره مخامخ کړي

نوموړي له اروپايي هېوادونو غوښتنه کړې چې د هر افغان د ژوند او خونديتوب جلا ارزونه وکړي او پرته له پلټنې دې د ایستلو پرېکړه نه کوي. د هغه په وینا، ډېری افغانان داسې حالت لري چې بېرته ستنېدل یې د ژوند او راتلونکې لپاره لوی ګواښ ګڼل کېږي

د ملګرو ملتونو د شمېرو له مخې، د روان زېږديز کال له پیله تر اوسه نږدې ۲۷۰ زره افغانان، چې ډېری یې له ایران او پاکستانه ایستل شوي، بېرته افغانستان ته ستانه کړل شوي دي

شنونکي وایي، په هېواد کې د بېوزلۍ، وزګارتیا او د مرستو د کمښت له امله راستنې شوې کورنۍ له سختو ستونزو سره مخ دي، او که د کډوالو د جبري ستنولو لړۍ همداسې روانه پاتې شي، نو بشري ناورین به لا پسې ژور شي