مقاله

پنجاب کې د کډوالو پر ضد پراخ عملیات؛ زرګونه افغانان ایستل شوي

اشتراک گذاری:

بریا نیوز (شنبه ،۲جوزا، ۱۴۰۵)

د پاکستان د پنجاب ایالت پولیسو اعلان کړی چې د بې‌اسناده بهرنیو وګړو د ایستلو د روان بهیر په ترڅ کې تر اوسه له دغه ایالته څه باندې ۳۵ زره بهرني وګړي، چې ګڼ شمېر یې افغانان دي، ایستل شوي دي

د پنجاب پولیسو ویلي، دغه عملیات د ناقانونه کډوالو د پېژندنې او ایستلو لپاره روان دي او امنیتي ادارې هڅه کوي هغه کسان بېرته خپلو هېوادونو ته واستوي چې د اوسېدو قانوني اسناد نه لري

راپورونه وایي، په وروستیو میاشتو کې د پاکستان په بېلابېلو سیمو کې د افغان کډوالو پر ضد پلټنې او نیونې زیاتې شوې دي. ګڼو افغان کورنیو شکایت کړی چې د نیونو، پلټنو او جبري ستنولو له امله له سختو ستونزو سره مخ دي

بلخوا د بشري حقونو ملاتړو بنسټونو اندېښنه ښودلې چې د کډوالو جبري ایستل ښايي د زرګونو افغانانو ژوند له خطر سره مخ کړي، ځکه ډېری بېرته ستنېدونکي کسان په افغانستان کې د بې‌وزلۍ، بېکارۍ او ناامنۍ له ستونزو سره مخامخ کېږي

شنونکي وایي، د پاکستان دا تګلاره نه یوازې پر افغان کډوالو سخت اغېز کوي، بلکې د دواړو هېوادونو پر سیاسي او ټولنیزو اړیکو هم سیوری غوړولی شي