مایک والټز: د کابل واکمنان بهرني وګړي د سیاسي او مالي امتیاز لپاره ساتي

مایک والټز: د کابل واکمنان بهرني وګړي د سیاسي او مالي امتیاز لپاره ساتي

بریانیوزپنجشنبه (۲۶/ سنبله /۱۴۰۵هـ.ش)

 د ملګرو ملتونو په امنیت شورا کې د امریکا استازي مایک والټز ادعا کړې چې د افغانستان اوسني واکمنان د امریکا په ګډون د بېلابېلو هېوادونو ځیني وګړي د سیاسي او مالي امتیازونو د ترلاسه کولو لپاره نیسي

والټز ویلي، د ده په وینا، د بهرنیو وګړو نیول د فشار او امتیاز اخیستنې د وسیلې په توګه کارول کېږي. نوموړي ټینګار کړی چې امریکا به د خپلو اتباعو د نیولو او له هغوی څخه د سیاسي فشار د وسیلې په توګه د کار اخیستلو وضعیت تر ډېره ونه زغمي

د امریکا د استازي څرګندونې په داسې حال کې دي چې واشنګټن د افغانستان پر چارواکو تور لګولی چې د امریکايي اتباعو په ګډون د بهرنیو وګړو د نیولو له لارې سیاسي امتیازونه غواړي. امریکا تر دې وړاندې افغانستان د «ناحقه نیونو د ملاتړ کوونکي دولت» په نوملړ کې شامل کړی و

په همدې تړاو، د امریکا حکومت د افغانستان کې د یوه امریکايي وګړي، پاول اووربي، د برخلیک په اړه د معلوماتو لپاره د میلیونونو ډالرو انعام هم اعلان کړی دی. اووربي په ۲۰۱۴ کال کې په خوست کې نادرکه شوی او تر اوسه یې د برخلیک په اړه کره معلومات نه دي ترلاسه شوي

د افغانستان چارواکو بیا د بهرنیو وګړو د نیولو په اړه د سیاسي امتیاز اخیستنې تورونه رد کړي او ویلي یې دي چې که کوم بهرنی وګړی د افغانستان له قوانینو څخه د سرغړونې په تور نیول شوی وي، موضوع یې باید د قانون له مخې وڅېړل شي