کابل : ملا محمد حسن اخند او الکسي اوورچوک د اقتصادي همکاریو پر پراختیا خبرې وکړې

اشتراک گذاری:

(بریانیو جمعه (۲۲/ عـقـرب/۱۴۰۵هـ.ش

د افغانستان د اسلامي امارت رییس‌الوزرا، ملا محمد حسن اخند، د روسیې د لومړي وزیر له مرستیال الکسي اوورچوک او مل پلاوي سره کتلي دي

ارګ په یوه خبرپاڼه کې ویلي چې په دې کتنه کې دواړو لورو د افغانستان او روسیې ترمنځ د دوه اړخیزو اړیکو، اقتصادي همکاریو، سوداګرۍ او پانګونې د پراختیا په اړه خبرې کړې دي

ملا محمد حسن اخند په افغانستان کې ټینګ شوی امنیت او ثبات د بهرنۍ پانګونې لپاره ښه فرصت بللی او ویلي یې دي چې په هېواد کې د پانګونې لپاره مناسب شرایط برابر شوي دي

نوموړي همداراز د اسلامي امارت د رسمیت پېژندنې په اړه د روسیې له دریځه او په نړیواله کچه د افغانستان د ملاتړ له امله مننه کړې ده

بلخوا، د روسیې د لومړي وزیر مرستیال الکسي اوورچوک په افغانستان کې د امنیت او وروستیو پرمختګونو ستاینه کړې او په بېلابېلو برخو کې یې د روسیې د پانګونې لېوالتیا ښودلې ده
اوورچوک همداراز له افغانستان سره د مسکو د هر اړخیز ملاتړ ډاډ ورکړی دی
دا لیدنه په داسې حال کې ترسره کېږي چې کابل او مسکو په وروستیو کې د اقتصادي او سوداګریزو اړیکو د پراختیا لپاره د همکاریو پر زیاتولو ټینګار کړی دی