سیستان او بلوچستان : د ایران په سرحد کې ۱۷ افغان کډوال د سختې تندې له امله مړه شوي

اشتراک گذاری:

بریانیوزچهار شنبه (۲۵/ سنبله /۱۴۰۵هـ.ش)

د ایران په ساراوان ولسوالۍ کې لږ تر لږه ۱۷ افغان کډوال، چې ښځې او ماشومان هم په کې شامل دي، د سختې تندې او اوبو د نشتوالي له امله مړه شوي دي. پېښه د روتک په سرحدي سیمه کې د «مک‌سوخته» په نوم ځای کې شوې ده

د راپورونو له مخې، دغه پېښه د سپټمبر پر ۱۰مه رامنځته شوې او د مړو جسدونه وروسته له سیمې راټول شوي دي. د ساراوان د سړو خونو د ظرفیت د نشتوالي له امله د قربانیانو جسدونه خاش ښار ته لېږدول شوي دي

د راپورونو له مخې، د مړو په ډله کې د بغلان ولایت د یوې کورنۍ پنځه غړي هم شامل دي. په دې کورنۍ کې یوه ۴۵ کلنه مور او د هغې څلور لوڼې شاملې دي چې عمرونه یې ۲۲، ۱۸، ۱۶ او ۱۴ کاله ښودل شوي دي

ځینې سیمه‌ییزې سرچینې وايي، په مړو کې لږ تر لږه شپږ له ۱۴ کلونو کم عمره ماشومان هم شامل دي. د قربانیانو خپلوانو ویلي چې دغه کسان د سفر پر مهال له سختې تندې او د اوبو له کمښت سره مخ شوي وو

د راپورونو له مخې، د یادې کورنۍ خپلوان په ساراوان کې مېشت دي او د قربانیانو د جسدونو د انتقال او ښخولو چارې یې تعقیب کړې دي

تر اوسه د ایران حکومت یا افغان چارواکو له لوري د پېښې په اړه رسمي او بشپړ جزئیات نه دي خپاره شوي. د پېښې د قربانیانو کره شمېر او ټول جزئیات هم په خپلواکه توګه نه دي تایید شوي