تهران او واشنګټن : د خبرو د بیا پیل پر سر د تهران او واشنګټن اختلاف؛ اقتصادي فشارونه زیاتېږي

تهران او واشنګټن : د خبرو د بیا پیل پر سر د تهران او واشنګټن اختلاف؛ اقتصادي فشارونه زیاتېږي

بریانیوزچهار شنبه (۲۵/ سنبله /۱۴۰۵هـ.ش)

 د ایران او امریکا ترمنځ د اوربند د دوام او د مستقیمو یا غیرمستقیمو خبرو د بیا پیل په اړه د دواړو لورو ترمنځ لا هم څرګند اختلافات شته؛ هغه وضعیت چې د سیمې امنیتي اندېښنې او اقتصادي فشارونه یې زیات کړي دي

واشنګټن په وروستیو څرګندونو کې ویلي چې له تهران سره د خبرو کومه روانه یا ټاکل شوې ناسته نه لري، په داسې حال کې چې د دواړو هېوادونو ترمنځ د خبرو د بیا پیل لپاره د منځګړو هېوادونو هڅې هم روانې پاتې شوې دي

د اختلاف مهمې موضوعګانې د ایران اټومي او توغندیز پروګرام، د هرمز تنګي وضعیت او پر ایران د امریکا بندیزونه دي. د خبرو په پخوانیو پړاوونو کې هم دواړو لورو پر دغو مسایلو بېلابېل دریځونه لرل او د یوې پراخې هوکړې لپاره پرېکړه نه ده شوې

د جګړې او د هرمز تنګي د تګ راتګ د محدودېدو اغېزې د انرژۍ پر نړیوال بازار هم څرګندې شوې دي. د تېلو د لېږد په اړه اندېښنو د خامو تېلو بیې لوړې کړې او د سیمې له شخړې سره تړلي اقتصادي خطرونه یې زیات کړي دي

د امریکا د کانګرس د بودجې دفتر په تازه ارزونه کې ویلي چې د ایران جګړې تر اګست لومړۍ نېټې پورې د امریکا دفاعي لګښتونه له ۳۸ میلیارد ډالرو اوښتي او د جګړې دوام کولی شي هره میاشت شاوخوا درې میلیارد ډالر نور لګښت ولري. دغه بنسټ همداراز د انرژۍ د لېږد د ګډوډۍ له امله د انفلاسیون د زیاتېدو احتمال یاد کړی دی

د تهران او واشنګټن ترمنځ د خبرو د بیا پیل څرنګوالی به تر ډېره د اوربند د وضعیت، د هرمز تنګي، بندیزونو او اټومي موضوع پر سر د دواړو لورو د دریځونو له نږدې کېدو سره تړاو ولري. تر اوسه د یوې هر اړخیزې هوکړې لپاره مشخصه نېټه نه ده اعلان شوې