اخبار جهان

واشنګټن : امریکا سعودي عربستان ته د ۲۴.۳ میلیارد ډالرو په ارزښت د ۴۸ اف-۳۵ الوتکو احتمالي پلور تایید کړ

اشتراک گذاری:

بریانیوز جمعه (۲۷/ سنبله /۱۴۰۵هـ.ش)

د امریکا د بهرنیو چارو وزارت سعودي عربستان ته د ۴۸ اف-۳۵ جنګي الوتکو د احتمالي پلور معامله تایید کړې ده چې ارزښت یې شاوخوا ۲۴.۳ میلیارد ډالره اټکل شوی دی

د دې احتمالي معاملې له مخې به سعودي عربستان ته د اف-۳۵ جنګي الوتکو ترڅنګ د الوتکو انجنونه، مخابراتي تجهیزات او د ساتنې او ملاتړ اړوند خدمتونه هم ورکړل شي

د معاملې د بشپړېدو لپاره لا هم د امریکا د کانګرس تایید ته اړتیا ده او تر تایید مخکې به دغه تړون وروستی نه ګڼل کېږي

د سعودي عربستان په واشنګټن کې سفارت د امریکا د بهرنیو چارو وزارت له دې اقدام هرکلی کړی او ویلي یې دي چې دا معامله به د دواړو هېوادونو ترمنځ دفاعي او امنیتي همکاریو د پیاوړتیا په برخه کې مهم ګام وي

که معامله د کانګرس له لوري تایید شي، سعودي عربستان به د اف-۳۵ پرمختللو جنګي الوتکو له ترلاسه کوونکو هېوادونو څخه وګرځي. د دې الوتکو په معامله کې د روزنې، تخنیکي ملاتړ او اړوندو تجهیزاتو برخې هم شاملې دي