اوچا: د اقلیمي بدلون زیانونه په افغانستان کې میلیونونه خلک ګواښي

اشتراک گذاری:

(بریانیو جمعه (۲۲/ عـقـرب/۱۴۰۵هـ.ش

په افغانستان کې د ملګرو ملتونو د بشري مرستو د همغږۍ دفتر (اوچا) وایي، هغه ټولنې چې د اقلیمي بدلون په رامنځته کېدو کې یې تر ټولو لږ رول درلود، اوس د دغې پدیدې تر ټولو درانه زیانونه زغمي

اوچا په یوه پیغام کې ویلي چې وچکالۍ او د اوبو کمښت په افغانستان کې د میلیونونو خلکو ژوند او د هغوی د معیشت سرچینې له جدي ګواښ سره مخ کړې دي

دغه بنسټ د اقلیمي بدلون پر وړاندې د مبارزې لپاره مالي سرچینو ته د عادلانه او اسانه لاسرسي غوښتنه کړې او ټینګار یې کړی چې دا مرستې باید هغو سیمو ته ځانګړې شي چې تر ټولو ډېره اړتیا ورته لري

اوچا خبرداری ورکړی چې د زیان‌منو ټولنو اغېزمن ملاتړ د اقلیمي بدلون له مخ پر زیاتېدونکو اغېزو سره د مبارزې او د افغانستان د خلکو د ژوند او معیشت د خوندي کولو لپاره اړین دی

افغانستان، چې د اقلیمي بدلون له سختو اغېزو سره مخ هېوادونو څخه ګڼل کېږي، په وروستیو کلونو کې د پرله‌پسې وچکالیو، د اوبو د کمښت او طبیعي پېښو له امله له جدي ننګونو سره مخ شوی دی