سیاست

ایران پر افغانستان کې د ټول‌شموله حکومت پر جوړېدو ټینګار وکړ

اشتراک گذاری:

بریانیوز - جمعه، ۲ اسد ١٤٠٥

د ایران د بهرنیو چارو وزیر عباس عراقچي ویلي، تهران د داسې افغانستان ملاتړ کوي چې خوندي، باثباته او د ټول‌شموله حکومت لرونکی وي

عراقچي دا څرګندونې د جمعې په ورځ د شانګهای همکاریو سازمان د بهرنیو چارو وزیرانو شورا په غونډه کې کړې دي. نوموړي ویلي، د افغانستان روان وضعیت لا هم د دې سازمان د غړو هېوادونو لپاره د امنیت او پراختیا له مهمو ګډو موضوعاتو څخه دی

د ایران د بهرنیو چارو وزیر ټینګار کړی چې د افغانستان ثبات د سیمې له امنیت او پرمختګ سره مستقیمه اړیکه لري او د ستونزو د حل لپاره سیمه‌ییزې همکارۍ ته اړتیا ده

عراقچي زیاته کړې چې د افغانستان د راتلونکي په اړه باید داسې لارې چارې ولټول شي چې د سولې، ثبات او دوامدار پرمختګ زمینه برابره کړي

د ایران دا څرګندونې په داسې حال کې دي چې د افغانستان د حکومت جوړښت، سیمه‌ییز امنیت او له ګاونډیو هېوادونو سره اړیکې لا هم د سیمې د هېوادونو د بحثونو له مهمو موضوعاتو څخه دي