کندهاري انار د روسیې تر بازارونو ورسېدل؛ د افغانستان د کرنې په برخه کې نوی اقتصادي ګام

د افغانستان د طالبانو د حکومت د کرنې، اوبولګولو او مالدارۍ وزارت اعلان کړی چې د کندهار د خوندورو او نړیوال شهرت لرونکو انارو لومړۍ محموله د روسیې بازارونو ته صادره شوې ده. دا ګام د هېواد د کرنیزو محصولاتو د نړیوال حضور په لور یو تازه او هیله‌منوونکی پرمختګ بلل کېږي 

د یاد وزارت د خبرپاڼې له مخې، شاوخوا ۲۵ ټنه تازه انار چې ارزښت یې نږدې ۲۵ زره امریکایي ډالره دی، د تورغونډۍ بندر له لارې روسیې ته صادر شوي دي. دا صادرات د کندهار د کرنې ریاست، د سوداګرۍ او پانګونې خونې او یو خصوصي شرکت په ګډه همکارۍ ترسره کړي دي

د کرنې وزارت مسؤلین وایي، تمه ده چې د سږني حاصلاتو تر پایه پورې ټولټال ۲۵۰ ټنه انار له کندهار څخه د روسیې بازارونو ته صادر شي. دغه اقدام به د افغان بزګرانو د عاید د زیاتوالي او د هېواد د کرنیزو محصولاتو د نړیوال شهرت لپاره مهم رول ولوبوي

ذبیح‌الله مجاهد، د طالبانو د حکومت ویاند، پر خپلې اېکس‌پاڼې (پخوانی ټویټر) لیکلي چې د انارو دا صادرات «له اقتصادي پلوه یو ډېر ارزښتناک ګام دی» او کولی شي د افغانستان د میوو لپاره، په ځانګړې توګه د کندهاري انارو لپاره، یو پراخ نړیوال بازار پرانیزي

کندهار د انارو د تولید زړه بلل کېږي. د کرنې وزارت د شمېرو له مخې، په دې ولایت کې نږدې ۱۵ زره هکټاره د انارو باغونه شته چې هر کال یې حاصلات شاوخوا ۲۷۰ زره ټنه ته رسېږي. د دغو حاصلاتو ډېره برخه عموماً ګاونډي هېوادونو، په ځانګړې توګه پاکستان ته صادرېده

خو سږکال د ډېورنډ کرښې پر اوږدو د طالبانو او د پاکستاني ځواکونو ترمنځ د نښتو له امله د دواړو هېوادونو ترمنځ سوداګریزې او ټرانزیټي لارې تړل شوې دي، چې له امله یې د انارو د بازار بیې په کور دننه راټیټې شوې دي

بزګران وایي، اوس مهال یوه کیلو انار یوازې ۲۵ افغانۍ پلورل کېږي، حال دا چې تېر کال یې بیه تر ۶۰ افغانیو رسېده. هغوی هیله لري چې د روسیې او نورو نوو بازارونو پرانیستل به د دوی زحمت او عرق ته نوی ارزښت ورکړي

د کندهار یو بزګر وايي: «که حکومت زموږ لپاره د بهرنیو بازارونو دروازې پرانیزي، موږ کولای شو له خپلې خاورې زرګونه ټنه انار بهر ته صادر کړو، خو اړتیا ده چې د صادراتو لارې خوندي او دوامداره وي

کارپوهان باور لري چې که د افغانستان حکومت وکولای شي د انارو، زعفرانو، مېوو او نورو کرنیزو محصولاتو لپاره د منځنۍ آسیا، ختیځې اروپا او عربي هېوادونو بازارونه پرانیزي، نو دا به د هېواد د اقتصاد د ودې او د بزګرانو د ژوند د ښه کېدو لپاره یو مهم بنسټیز بدلون راولي

د کندهار انار، د افغانستان د خاورې له خوند او رنګ ډک نعمت، اوس د روسي میزونو ښکلا ګرځي  دا یوازې یو صادراتي ګام نه، بلکې د افغان کرنې د بېرته راژوندي کېدو نښه ده