محکمې د اکرام امام‌ اوغلو لپاره بې‌ سارې سزا اورولې؛ مخالفان: «د عدالت تر نوم لاندې سیاسي انتقام روان دی

د ترکیې په قضايي نظام کې یو بې‌ساری او د حیرانتیا وړ حکم هغه وخت اعلان شو، کله چې یوې محکمې د استانبول د پخواني ښاروال او د ولسمشر رجب طیب اردوغان د مهم سیاسي سیال، اکرام امام‌اوغلو ته ۲ زره او ۳۵۲ کلونو د بند سزا واوروله

امام‌اوغلو، چې د اپوزېسیون یو مخکښ او د ۲۰۲۸م کال احتمالي ولسمشرۍ نوماند بلل کېږي، د ترکیې په میلیوني ښار استانبول کې د ۲۰۱۹م کال ټاکنو له لارې خپل شهرت لا لوړ کړ؛ ټاکنې چې اردوغان او د هغه ګوند ته یې یو دروند سیاسي ضربه ورکړه

مخالفان: «اردوغان دیکتاتورۍ ته ګامونه زیاتوي

د اپوزېسیون غړي او د امام‌اوغلو پلویان دا قضیه په کلکه سیاسي بولي او وایي چې دا حکم د عدالت نه، بلکې د واک د ساتلو لپاره د اردوغان اقدام دی

د هغوی په وینا، حکومت هڅه کوي د داسې درنو او غیرواقعي سزاګانو له لارې د امام‌اوغلو مخ په زیاتېدو محبوبیت ته زیان ورسوي، خو «خلک پوهېږي چې دا ډول فیصلې پر سیاسي حقیقت اغېز نه شي کولی

یو سیاسي کارپوه وایي:

د ۲ زره کلونو سزا په حقوقي منطق کې ځای نه لري؛ دا د سیاسي فشار ښکاره نښه ده. دا ډول فیصلې نه یوازې د عدالت سیستم ته زیان رسوي، بلکې د حکومت د وېروونکي چلند انعکاس هم دی

:په ټول ترکیه کې غبرګونونه زیات شوي

له حکم وروسته په استانبول، انقره او ګڼو لویو ښارونو کې خلکو سړې سړې غږې، لاریونونه او د عدالت غوښتنې شعارونه پورته کړي دي

د خلکو په باور، امام‌اوغلو هغه شخصیت دی چې د دوی د رایې ځواک یې ثابت کړی، او د عدالت په نوم د سیاسي تصفیې هڅې به یې د محبوبیت د کمېدو پر ځای، لا زیات مشهور کړي

اکرام امام‌اوغلو په یوه غبرګون کې ویلي دي:

"زما مبارزه د ترکیې د رڼا راتلونکي لپاره ده. نه سزا، نه فشار، او نه هم سیاسي لوبې به زه له دې لارې واړوي

د ترکیې راتلونکې سیاسي فضا لا تودېدونکې ښکاري. د امام‌اوغلو پر ضد د دې حیرانوونکې سزا تر اعلان وروسته، څارونکي وايي چې هېواد به د سختو سیاسي تاوتریخوالو، پراخو لاریونونو او ژورو سیاسي بدلونونو شاهد وي